Familja dhe sfidat e saj në qendër të videomesazhit të Papës në Takimin Botëror të
Familjeve
(20.01.2009 RV)“Familja është themeli
i domosdoshëm i shoqërive dhe i popujve”, “një shkollë e vërtetë humaniteti dhe vlerash
të përhershme”. Kështu tha të dielën Papa Benedikti XVI, në lidhje video, në përfundim
të Takimit VI Botëror të familjeve në Qytetin e Meksikos, i cili përfundoi me Meshën
e Shenjtë, të kremtuar nga Legati Papnor, kardinali Tarçizio Bertone. Papa lajmëroi
se takimi i ardhshëm do të mbahet në vitin 2012 në Milano, me temën “Familja, puna
dhe festa”. Ati i Shenjtë kujtoi se përgjigjja e krishterë për sfidat, që duhet
të përballojë familja në botën e sotme është forcimi i besimit në Zotin, një forcë
që vjen nga feja, e ushqyer nga dëgjimi i Fjalës së Zotit: “La familia es
un fundamento indispensable para la sociedad y los pueblos….” ”Familja
është themel i domosdoshëm për shoqërinë dhe popujt dhe një pasuri e pazëvendësueshme
për fëmijët – pohoi Benedikti XVI – të denjë për të lindur si fryt dashurie, si dhuratë
e plotë e bujare e prindërve. Një shkollë e vërtetë humaniteti e vlerash të përhershme,
themeluar mbi martesën e pandashme ndërmjet një burri e një gruaje, ambienti ku personi
mund të lindë me dinjitet e të rritet në mënyrë të gjithanshme”. “Esta labor
educativa se ve dificultada por un engañoso concepto de libertad…” Një
përpjekje edukative, vazhdoi Ati i Shenjtë, që pengohet nga një koncept i gabuar i
lirisë, ku impulset ekzaltohen deri në atë shkallë, saqë e bëjnë njeriun peng të vetvetes.
“Liria e vërtetë e njeriut – nënvizoi Papa Racinger – vjen ngaqë është krijuar si
shëmbëlltyrë e në ngjarshmëri me Zotin”. E në vatrën familjare mëson si të jetojë
e si të dallojë vlerat e vërteta. “Hoy más que nunca se necesita el testimonio
y el compromiso público de todos los bautizados…” “Sot më shumë se kurrë
kemi nevojë për dëshminë dhe impenjimin publik të të gjithë të pagëzuarve – këshilloi
Papa – për të ripohuar dinjitetin dhe vlerën e vetme e të pazëvendësueshme të familjes”.
Prandaj, Benedikti XVI i ftoi institucionet që ta mbështesin familjen edhe nga pikëpamja
legjislative. Para se të shpallte takimin e ardhshëm të familjeve në Milano, Ati i
Shenjtë siguroi afërsinë e tij shpirtërore me të gjitha familjet e mëdha në numër,
me ato që vuajnë nga varfëria, sëmundjet, nga problemet e emigracionit, por sidomos
me ato që persekutohen për shkak të fesë. “Y muy especialmente en las familias
cristianas que son perseguidas a causa de su fe...”