ജീവന്‍ സംരക്ഷിക്കുന്നതിനു് ‘ജീവന്‍െറ ജാലകങ്ങള്‍’ പോളണ്ടില്‍
ഗര്‍ഭച്ചിദ്രത്തിനു് തടയിട്ടു്, ജീവന്‍ സംരക്ഷിക്കുന്നതിനു് ‘ജീവന്‍െറ ജാലകങ്ങള്‍’ എന്ന പേരില്‍ ഒരു സ്ഥാപനത്തിനു് പോളണ്ടിലെ സഭ രുപമേകിയിരിക്കുന്നു. വാഴ്ത്തപ്പെട്ട എഡ്മുണ്ട് ബോഷ്നോവിക്സിയുടെ നാമത്തിലാണ് അതു് സ്ഥാപിതമായിരിക്കുന്നതു്. ആ സ്ഥാപനത്തിന്‍െറ മൂന്നാമത്തെ ശാഖ അടുത്തയിട ചെസ്തഹോവായില്‍ ആശീര്‍വദിക്കപ്പെട്ടു. ദൈവമാതാവിന്‍െറ അമലോത്ഭവത്തിന്‍െറ ദാസികളെന്ന സന്യാസിനി സമൂഹത്തിന്‍െറ ആഭിമുഖ്യത്തിലാണ് ആ സ്ഥാപനം നടത്തപ്പെടുന്നതു്. അതിന്‍െറ മറ്റു രണ്ടു സ്ഥാപനങ്ങള്‍ ക്രാക്കോവിലും, വാര്‍സോവിലും ആണു്. തങ്ങള്‍ക്കു് ആവശ്യമില്ലെന്നു്, വളര്‍ത്തുവാന്‍ സാധിക്കുകയില്ലെന്നു് തോന്നിക്കുന്ന കുഞ്ഞുങ്ങളെ മാതാക്കള്‍ക്കു് രഹസ്യമായിത്തന്നെ അവിടെ ഏല്പിക്കാം. അവിടെ സ്വന്തം കുടുംബത്തിലെന്നപ്പോലെ കുഞ്ഞുങ്ങള്‍ക്കു് സ്നേഹവും, സുരക്ഷിതത്വവും, സംരക്ഷണവും ലഭിക്കും. ചെസ്തഹോവായിലെ ആ സ്ഥാപനത്തിന്‍െറ ശാഖയുടെ ആശീര്‍വാദകര്‍മ്മം നടത്തവെ, ചെസ്തഹോവാ അതിരുപതാസാരഥി ആര്‍ച്ചുബിഷപ്പു് സ്റ്റാന്‍സ്ലോ നോവാക് ‘വാഴ്ത്തപ്പെട്ട എഡ്മുണ്ട് ബോഷ്നോവിക്സിയുടെ ജീവന്‍െറ ജാലകം’ നവജാതശിശുക്കളുടെ പ്രത്യാശയുടെ അടയാളമാണെന്നു് വിശേഷിപ്പിച്ചു. ഗര്‍ഭച്ചിദ്രത്തിനെതിരെയായ ധര്‍മ്മപോരാട്ടവേദിയാണതു്. നന്മയും, കാരുണ്യവും ആണ് അവിടത്തെ ആയുധങ്ങള്‍, ആര്‍ച്ചുബിഷപ്പു് കുട്ടിചേര്‍ത്തു.
| All the contents on this site are copyrighted ©. |