(18.01.2009 RV)Sot Kisha katolike
kremtoi të dielën e dytë të kohës së zakonshme liturgjike gjatë vitit kishtar
dhe ditën e parë të Javës së lutjes për bashkimin e të krishterëve me temë:
“Zoti është i madh në dashuri. Të jemi të bashkuar. Bashkësia e krishterë përballë
përçarjeve të vjetra e të reja”.
“Dëgjoje, o Zot, britmën
e popullit tënd: të krishterët përballë luftërave e dhunës”- është tema e ditës
së dytë të Javës së lutjes, që do të kremtohet të hënën, në festën e
Shën Gjermanikut, martir i Filadelfies; Shën Gjonit, ipeshkëv i Ravenës; Shenjtorëve
Mario, Marta e Abako, martirë.
Të martën, njëheresh me ditën e tretë
të Javës së lutjes për bashkimin e të krishterëve, do të kremtohen edhe Shën Fabiani
papë e martir e Shën Sebastiani martir, që na kujtojnë thirrjen e Psalmistit “Dëgjoje,
o Zot, britmën e popullit tënd e na mëso sesi duhet të qëndrojnë të krishterët përballë
luftërave e dhunës”.
Të mërkurën, dita e katërt e Javës së lutjes për
bashkimin e të krishterëve, me temë ‘Me jetën time, o Zot, do të këndoj lavdinë tënde:
të krishterët përballë krizës ekologjike”, është edhe festa liturgjike e Shën Anjezes,
virgjër e martire.
E enjtja është edhe dita e pestë e Javës së lutjes,
me temë: “Na bashkon në gëzim dashuria e Zotit. Të krishterët përballë diskriminimit
e paragjykimeve shoqërore”. Kisha përkujton Shën Vinçencin, diakon spanjoll e martir,
Shën Vinçenc Palotin, meshtar, themelues i Shoqatës së Apostullimit katolik e Shën
Anastasin, murg e martir.
Dita e gjashtë e Javës së lutjes e premtja,
që na kujton se kush i beson me gjithë zemër Zotit, nuk ka frikë nga asgjë. Kështu
edhe të krishterët përballë pluralitetit të feve. Do të përkujtohen Shën Emerenciana,
martire romake e Shën Hildefonsi, ipeshkëv i Toledos. E shtuna është dita
e shtatë e Javës së lutjes. Përshkohet nga brohoria: “Ta lavdërojmë Zotin, është ai
paqja jonë, përballë pluralitetit të feve”. Ështëditëfeste e Shën Françeskut
të Sales, ipeshkëv i Gjenevës, doktor i Kishës, themelues i Urdhërit të Vizitacionit,
Pajtor i shtypit katolik.
E diela e ardhshme është e treta e kohës së
zakonshme liturgjike gjatë vitit kishtar dhe e teta e Javës së lutjes.Na
fton ta bekojmë Zotin, që dhuron jetë, e ta shpallim me guxim shpresën e krishterë,
në një botë gjithnjë më të përçarë.