வழிபாட்டு ஆண்டின் 2 ஆம் ஞாயிறு மறையுரை - 17-01 – 09 .
நற்செய்தி - புனித யோவான் 1, 35 – 42 .
மையக்கருத்து – தூய அந்திரேயாவைப் போல நாமும் கிறிஸ்துவில் நாம் கொண்டுள்ள விசுவாசத்தை பிறரோடு பகிர்ந்து கொள்ளவேண்டும் .
சில ஆண்டுகளுக்கு முன்னர் ஒரு முதியவர் மருத்துவ மனையில் சேர்க்கப்பட்டார் . அவரை வசதியாக இருக்கச் செய்த பிறகு செவிலிப் பெண் வழக்கமாக குறிக்க வேண்டிய சில கேள்விகளைக் கேட்டார் . ஒரு கேள்வி அவர் எந்த மதத்தைச் சேர்ந்தவர் என்பதாகும் . முதியவர் நான் கத்தோலிக்கத் திருச்சபையை விரும்புகிறேன் . ஆனால் அம்மதம் பற்றி இதுவரை யாரும் எனக்குத் தெரியப்படுத்தவில்லை என்று கூறினார் . நீங்கள்தான் முதல்முறையாக என்னிடம் அந்தக் கேள்வியைக் கேட்கிறீர்கள் என்றார் .
இந்த நிகழ்ச்சி ஒரு சிக்கலான கேள்வியை எழுப்புகிறது . நம்மில் பலர் ஏன் நாம் உறுதியாகப் பற்றிக்கொண்டிருக்கும் இறைப்பற்றைப் பற்றி , விசுவாசத்தைப் பற்றி பிறரோடு பேசத் தயங்குகிறோம் . நாம் நற்செய்தியை நம்புகிறோம் என்றால் நாம் ஏன் அது பற்றிப் பிறரோடு பேசுவதில்லை . நாம் பெறக்கூடிய கொடைகளிலேயே மிகப் பெரிய கொடை இயேசு என்ற நம் இதய வேந்தர் என்றால் அவர்மீது நாம் கொண்டிருக்கும் பக்தியை ஏன் பிறருக்கு அறிமுகம் செய்யத் தயக்கம் காட்டுகிறோம் .
இன்றைய நற்செய்திக்கு வருவோம் . குறிப்பாக தூய யோவான் அவருடைய நற்செய்தியில் மூன்று முறை அந்திரேயாவைப்பற்றிப் பேசுகிறார் . ஒவ்வொருமுறையும் அந்திரேயா யாரையாவது இயேசுவிடம் அழைத்து வருகிறார் .
இன்றைய நற்செய்தியில் தம் சகோதரர் பேதுருவை அவர் இயேசுவிடம் அழைத்துவருகிறார் . முடிவாக இயேசு பேதுரு என்னும் பாறையின்மீது தமது திருச்சபையைக் கட்டி எழுப்புகிறார் .
சில காலம் தாழ்த்தி அந்திரேயா ஐந்து அப்பங்களும் இரண்டு மீன்களும் வைத்திருக்கும் ஒரு சிறுவனை இயேசுவிடம் கூட்டி வருகிறார் . யோவான் 6,8. இயேசு அந்த அப்பங்களைப் பலுகச் செய்து பல ஆயிரம் பேருக்கு உணவளிக்கிறார் .
இறுதியாக அந்திரேயா சில கிரேக்க மக்களை இயேசுவிடம் கூட்டி வருகிறார் . யோவான் 12, 20 - 22. அந்தச் சந்தர்ப்பத்தில் வந்த கிரேக்கர்களுக்கு இயேசு நல்ல அறிவுரை வழங்கினார் . நாம் மீண்டும் முந்தைய கேள்வியை எழுப்புவோம் . நாம் இயேசுவின்மீது பக்தி என்னும் காதலில் மூழ்கியிருந்தால் அவரை ஊருக்கும் உலகுக்கும் அறிமுகம் செய்ய என்ன தயக்கம் .
நாம் சில சமயம் கேட்கும் ஒரு பதில் என்னவென்றால் மற்றவர்கள் அதை இரசனையோடு கேட்பதில்லை என்பதாகும் . நாம் தொடக்கத்தில் கேட்ட நிகழ்ச்சியில் மருத்துவமனைக்கு வந்த முதியவர் இயேசுவின் மீது பற்றுக்கொள்ள விருப்பம் இல்லாது இருந்தவர் என எண்ணியிருக்கலாம் . அல்லது அவருக்கு இயேசுவின்மீது விருப்பம் இருந்திருந்தால் அவரே இயேசுவைப்பற்றிக் கேட்டுத் தெரிந்திருக்கலாமே என எண்ணலாம் .
சுய முன்னேற்றத்துக்கான வழிகளைப் பற்றி நாம் சில நூல்களில் படித்துத் தெரிந்து கொள்கிறோம் . பிறரோடு உறவை வளர்ப்பது எப்படி – நன்கு பழகுவது எப்படி – அன்பு செய்வது எப்படி எனத் தெரிந்து கொள்கிறோம் . இப்படிப்பட்ட நூல்களில் நாம் பிறரோடு நமக்குப் பிடித்தமான காரியங்கள் பற்றிப் பேசவேண்டும் எனக் கூறப்படுகிறது . இயேசுவின் மீது நாம் பற்றுக்கொண்டிருந்தால் , அவரே நம் வாழ்வாய் , வழியாய் , ஒளியாய் இருக்கிறார் என்றால் , அவரே நம்மைப் படைத்துக் காத்து மீட்பவர் என்றால் அவரில் வாழ்கிறோம் , இருக்கிறோம் , இயங்குகிறோம் என்றால் அவரை விட மிக முக்கியமானது வாழ்வில் என்னவாக இருக்க முடியும் .
இது ஒரு முக்கியமான திட்டத்துக்கு நம்மை அழைத்துச் செல்கிறது . நாம் நம்முடைய இறைப்பற்றைப் பிறரோடு பகிர்ந்து கொள்ளவேண்டும் . இது முக்கியமானது அல்ல என எண்ணுகின்றவர்கள் மருத்துவ மனைக்கு வந்த முதியவர் சொன்னதை நினைவில் வையுங்கள் . அவர் சொன்னார் – யாருமே என்னிடம் இயேசுவைப்பற்றிப் பேசவில்லை என்று. யாருமே பேசாதிருந்திருந்தால் , அந்த செவிலிப்பெண்ணும் பேசாதிருந்திருந்தால் , அவர் இயேசுவின் மீது பற்றுக்கொள்ளாமலேயே இறந்திருப்பார் .
எவர் ஒருவர் தாம் பெற்ற பேரின்பமாகிய இயேசுவைப் பிறரோடு பகிர்ந்து கொள்ளத் தயங்குகிறாரோ அவர் இன்றைய நற்செய்தியை நினைவில் கொள்ளவேண்டும் .
அந்திரேயா தமது விசுவாசத்தைப் பகிர்ந்து கொள்ளாதிருந்திருந்தால் பேதுரு திருச்சபையின் பாறையாக இருந்திருக்கமாட்டார் . உரோமையில் உலகப் புகழ்பெற்ற தூய பேதுரு பசிலிக்கா பக்தர்களையும் பார்வையாளர்களையும் பரவசமடையச் செய்யும் பேராலயமாக , அருள் பாய்ந்து வரும் வாய்க்காலாக, அகிலமெல்லாம் படைத்த ஆண்டவனே குடியிருக்கும் கோவிலாக இருந்திருக்காது .
அந்திரேயா ஐந்து அப்பங்களை வைத்திருந்த சிறுவனை இயேசுவிடம் கூட்டி வரவில்லை என்றால் ஐயாயிரம் பேருக்கு இயேசு உணவு வழங்கிய நிகழ்ச்சியை ஒருவேளை நாம் கேட்டிருக்கமுடியாது . வந்திருந்தோர் பசியோடும் களைப்போடும் சென்றிருப்பார்கள்.
முடிவாக, இன்றைய நற்செய்தி நாம் சரியாகச் சிந்தித்து நாம் ஏன் இயேசுவை பிறருக்கு அறிமுகம் செய்யத் தயங்குகிறோம் என்பதை ஆராய்ந்து , காரணம் கண்டு நலமான முடிவுக்கு வர நம்மை அழைக்கிறது .
நற்செய்தியை நாம் நம்புகின்றோம் என்றால் , உலகிலேயே விலைமதிப்பில்லாத அரும் பொருள் இயேசுக்கிறிஸ்துதான் என்றால் ,அதை நாம் ஏன் நம் குடும்பத்திலும் , நண்பர்களிடத்திலும் , நமக்கு அறிமுகமானவர்களிடத்திலும் , இயேசுவைத் தேடிக்கொண்டிருப்பவர்களிடத்திலும், அறிமுகம் செய்யத் தயக்கம் காட்ட வேண்டும் .
இந்த முக்கியமான கேள்வியை இன்றைய நற்செய்தி நமக்கு முன் வைக்கிறது . இந்தக் கேள்விக்கு நாமே தான் பதில் கூறவேண்டும் . ஆனால் கண்டிப்பாக விடை அளித்தே ஆகவேண்டும் . நாம் நம்பும் இயேசுவைப் பற்றி அறிந்து கொள்ள மக்கள் ஆர்வமாக இருக்கிறார்கள் . நம்முடைய பக்தியைப் பற்றிப் பேசுவது முக்கியமானதாகும் , மிக மிக முக்கியமானதாகும் .
உலக வரலாற்றையே தம் பிறப்பால் கிறிஸ்துவுக்கு முன்னர் , கிறிஸ்துவுக்குப் பின்னர் எனப் பிரிப்பதற்குக் காரணமானவர் , உலகை உருவாக்கிக் காத்து ஆண்டு வருபவர் , இறந்தோரை உயிர்ப்பித்தவர் , இறந்தபின் உயிர்த்தெழுந்தவர் , என எத்தனை , எத்தனையோ சான்றுகள் அவரே சக்தியும் ஜீவனுமாக இருக்கிறார் என இடியோசையிட்டு நம் காதுகளில் முழக்கமிட்டும் நற்செய்தி துளைக்காக காதுகளும் , அவர் புகழ்பாடாத நாவும் , அவரைச் சிந்திக்காத தலையும் பிழைப்பது எப்படி .
இறைவா இவ்வுலகில் தேவையுறுவோர்க்கு எங்கள் கரங்கள் வழியாகவே நீர் உதவுகிறீர் என்பதையும் , தனிமையில் வாடுவோரை எங்கள் இதயங்களாலேயே அணைக்கிறீர் என்பதையும் , நீர் ஏன் பிறந்தீர் , துன்புற்றீர் , மரித்தீர் என்பதை அறிவிக்க எங்கள் குரலல்லாது உமக்கு வேறு குரல் இல்லை என்பதையும் அறிந்திடும் மெய்யறிவைக் கற்றுத்தாரும் . இவ்வுலகில் நாங்களே உம்முடைய கரங்களாக , குரலாக , உமது இதயமாக இருக்கிறோம் என்பதை உணரச் செய்யும் . அவ்வாறு செயல்பட அருள் தாரும் .
| All the contents on this site are copyrighted ©. |