Ipeshkvijtë amerikanë presidentit Obama: impenjim i përbashkët për mbrojtjen e jetës,
të paqes e të familjeve.
(16.01.2009 RV)Ipeshkvijtë amerikanë e sigurojnë presidentin e ri, Barak Obama
si dhe Kongresin e ri, për kontributin e tyre në këtë fazë ndryshimesh të thella,
që po jetojnë Shtetet e Bashkuara të Amerikës. Kisha është gati të japë ndihmesën
e vet, krah për krah me shtetin, për mbrojtjen e jetës së njerëzve më të ligshtë
e për paqen në botë. Në një letër, nënshkruar nga kardinali Frensis Xhorxh, kryeipeshkëv
i Çikagos dhe kryetar i episkopatit amerikan, prelatët vënë theksin mbi të gjitha
sfidat, që duhet të përballojë presidenti i ri, duke filluar nga 20 janari i ardhshëm.
Flasin për masa të forta e të matura që ndihmojnë veçanërisht familjet e varfëra të
punëtorëve në kushtet e krizës ekonomike dhe për më shumë përgjegjësi në përballimin
e shpërdorimeve të sistemit, shkaktare të krizës financiare. Në frontin ndërkombëtar,
prelatët kërkojnë një Irak të lirë nga persekutimet fetare dhe fundin e konfliktit
në Tokën Shenjte. Në Dokument urohet, gjithashtu, që administrata e Uashingtonit
të impenjohet më shumë në luftën kundër SIDËS, duke iu kundërvënë sëmundjes së tmerrshme
me mjete të përshtatshme e moralisht të pranueshme. Pjesa kryesore e letrës drejtuar
Obamës i kushtohet familjes dhe mbrojtjes së jetës.