Qyteti i Meksikos: të mbështetet familja si shkollë e humanitetit dhe e jetës së krishterë.
(15.01.2009 RV)Dëshmi, këngë dhe diskutime nga meshtarë e laikë, karakterizuan
ditën e parë të Takimit botëror të familjeve në Qytetin e Meksikos. Duke hapur Kongresin
teologjiko-baritor, kryetari i Këshillit Papnor për Familjen, kardinali Enio Antoneli,
shpjegoi vizionin e Kishës për institutin familjar. Familja – tha Hirësia e Tij –
është shkolla më e mirë e humanitetit dhe e jetës së krishterë, bashkësi e qëndrueshme
jete e dashurie, që realizon formimin e harmonishëm e të gjithanshëm të njeriut. Duke
kujtuar vështirësitë aktuale, ndërmjet të cilave, emergjenca edukative dhe thellimi
gjithnjë më i madh i hendekut ndërmjet breznive, kardinali Antoneli pohoi se familja
ka të drejtë të plotë të edukojë e të formojë. Më pas, kryeipeshkvi i Qytetit të
Meksikos, kardinali Norberto Rivera Karrera, kërkoi që familja të shikohet si dhuratë
për shoqërinë njerëzore, një shoqëri kjo, që ka shumë nevojë të ndriçohet nga vlerat
shpirtërore, në se dëshiron të ecë përpara. E për ta realizuar këtë, Kisha mbështet
e promovon martesën e zanafillës ndërmjet burrit e gruas, pa të cilën nuk mund të
bëhet fjalë për ardhmëri të njerëzimit.Atë Raniero Kantalamesa, predikatar i Shtëpisë
Papnore, pohoi, në fund, se duhet rizbuluar ideali biblik i martesës e i familjes.