Ngushëllimet e Benediktit XVI për vdekjen e kardinalit Pio Lagi
(12.01.2009 RV)Mbrëmë në spitalin
romak të Shën Karlit të Nansit ndërroi jetë në moshën 86 vjeçare, kardinali Pio Lagi.
Mesha e dritës do të kremtohet nesër në Bazilikën e Shën Pjetrit në Vatikan, kryesuar
nga Dekani i Kolegjit Kardinalor, kardinali Angjelo Sodano. Në liturgjinë e salikimeve
do të jetë i pranishëm edhe Papa i cili, përmes një telegrami ngushëllimi drejtuar
familjarëve të kardinalit të ndjerë, shprehu ngushëllimet, duke nënvizuar se humbja
e kardinalit Lagi e ka prekur thellësisht. Më pas Papa kujton shërbimin e kardinalit
Lagi në gjirin e Selisë së Shenjtë, posaçërisht si prefekt i Kongregatës për edukimin
katolik. Benedikti XVI e përfundon telegramin duke iu lutur Zotit t’i japë të ndjerit
çmimin që u premtohet shërbëtorëve besnikë të Ungjillit”. Në Meshën e dritës, që
do të kremtohet nesër, Papa do t’u drejtojë fjalën të pranishëmve dhe do të marrë
pjesë në ritin e lamtumirës së fundit.Kujtojmë se Pio Lagi u krijuar kardinal nga
Papa Gjon Pali II më 1991, pasi kishte kryer misionin meshtarak e ipeshkvnor në disa
nga fushat më të rëndësishme të veprimtarisë së Kishës, duke nisur nga viti 1946,
kur u shugurua meshtar. Kreu sidomos detyrën e nuncit apostolik në Tokën Shenjte,
në Argjentinë e në Selinë diplomatike të Vatikanit në Uashington. Në video-konferencën
e fundit, mbajtur në dhjetorin e kaluar, foli pikërisht për një nga ngjarjet më aktuale
të jetës amerikane, me ndikim mbi gjithë botën: zgjedhjen e një presidenti me ngjyrë:
“Obama
i jep fund traditës, që zgjati 220 vjet, të 43 presidentëve të bardhë. Kjo që ndodhi
më 4 nëntor, besoj se mund të konsiderohet si çlirim nga ai mëkat i tmerrshëm - që
për shumë vjet me radhë njollosi fytyrën e natyrën e SHBA, dmth nga skllavëria e zezakëve".
Duke pohuar se ishte një mendjeje me qëndrimet
e Obamës ndaj drejtësisë shoqërore, shëndetësisë e emigracionit, shtonte: “Natyrisht,
duke shpresuar të mbrohet familja, sepse kjo është pika themelore e marrëdhënieve
me Kishën katolike, që përfaqëson 25% të popullsisë së SHBA e është një bllok shumë
i fuqishëm, shtyllë kurrizore e kësaj shoqërie. Përveç saj, është edhe mbrojtja e
familjes, mospranimi i çifteve të parregullta e sidomos, mbrojtja e jetës nga zënia,
në vdekjen e natyrshme”. Emri i kardinalit Pio Lagi është mjaft
i njohur edhe në Shqipëri, për ndihmesën e tij të pakursyer në zhvillimin e vendit,
sidomos në fushat e shëndetësisë, të arsimit e të kluturës. Mjafton të kujtojmë praninë
e tij në përurimin e Universitetit Katolik “Zoja e Këshillit të Mirë” në Tiranë, më
21 janar të vitit 2005.