Mbreti i Bahreinit dhuron terrenin për të ngritur një kishë katolike
(05.01.2009 RV)Bahreini do të ketë një kishë të re katolike. Terreni është
dhuruar pikërisht nga mbreti i vendit arab. Është përgjigjia që sovrani i jep ftesës
së Papës Benedikti XVI për të lejuar ndërtimin e vendeve të tjera të kultit për katolikët.
Ati i Shenjtë e pati përmendur këtë gjatë paraqitjes së letrave kredenciale të ambasadorit
të parë të Bahreinit në Vatikan, duke iu referuar rritjes së numrit të katolikëve.
Nga 800 mijë banorët, 80% janë myslimanë, ndërsa katolikët, shumica punëtorë të ardhur
nga vendet aziatike, përbëjnë 10% të popullsisë. Bahreini është vendi i parë i Gjirit
Persik që ka lejuar hapjen e kishave katolike. Pikërisht, këtë vit bie 70-vjetori
i hapjes së kishës së Zemrës së Krishtit, shuguruar në ditën e Krishtlindjes së vitit
1939.