Në lutjen e Engjëllit të Tënzot, thirrja e Papës për paqe në Tokën Shenjte dhe për
mbrojtjen e fëmijëve.
(06.01.2009 RV)Në lutjen e Engjëllit
të Tënzot, kushtuar armiqësisë me të cilën e priti Jezusin Herodi – armiqësi që çoi
në masakrimin e fëmijëve të pafajshëm – Benedikti XVI u drejtoi urimet më të përzemërta
vëllezërve e motrave të Kishave Lindore, që ndjekin kalendarin Julian e do ta kremtojnë
nesër Krishtlindjen. E mendimi i Papës nuk mund të mos shkonte në Tokën Shenjte e
në Lindjen e Mesme, që vijojnë të tronditen rëndë nga vringëllima e armëve:
“Vijoj
të ndjek me shqetësim të thellë ndeshjet e rrepta të armatosura, që zhvillohen edhe
në këtë çast në Rripin e Gazës. Ndërsa ripohoj se urrejtja e mospranimi i dialogut
çojnë vetëm në luftë, inkuarjoj nismat dhe përpjekjet e të gjithë atyre që, duke pasur
për zemër paqen, po bëjnë çmos t’i ndihmojnë izraelitët e palestinezët të ulen rreth
tryzës e të bisedojnë. Zoti u dhëntë forcë këtyre ndërtuesëve të paqes t’i vijojnë
përpjekjet e tyre”.
Më pas Papa foli për Ditën Misionare
të Fëmijëve, që kremtohej sot, duke kujtuar fëmijët të cilëve u mohohet fëmijëria
në shumë vende të botës, posaçërisht në Republikën e Kongos, ku mijëra fëmijë janë
viktima të rrëmbimeve të përgjakshme. U bëj thirrje – theksoi Ati i Shenjtë - autorëve
të këtyre mizorive çnjerëzore:
“T’ua rikthejnë fëmijët familjeve të tyre
e t’u krijojnë një ardhmëri sigurie e zhvillimi, për të cilën kanë plotësisht të drejtë,
së bashku me këto popullsi të dashura”.
Papa kujtoi
në përfundim edhe se në vitin 2009 përkujtohet 20-vjetori i Konventës për të Drejtat
e Fëmijës, një impenjim që bashkësia ndërkombëtare duhet ta vijojë, duke mbrojtur
e promovuar jetën e fëmijëve në mbarë botën.