Në prag të takimit botëror të familjeve, në Qytetin e Meksikos
(05.01.2009 RV)Pas pak ditësh,
e pikërisht më 13 janar, në Qytetin e Meksikos do të fillojnë punimet e takimit të
gjashtë botëror të familjeve. Tema e këtij takimi, që do të përfundojë më 18 janar,
është “Familja e edukon njeriun me vlerat njerëzore e kristiane”. Në letrën, përmes
së cilës emëronte kardinalin Tarçizio Bertone, sekretar i Shtetit të Vatikanit, legat
papnor për takimin në Qytetin e Meksikos, Papa kujton se prindërit janë edukatorët
e parë e kryesorë të fëmijëve të tyre. Familja – nënvizon - është e thirrur të luajë
rolin e vet edukativ në Kishë, duke marrë pjesë kështu në jetën e në misionin kishtar.
E më pas kujton shembullin e pesë familjeve shenjte. Së pari, Shenjtorët Bazili e
Emelia, që jetuan në Kapadokien e shekullit IV, dëshmitarë feje gjatë persekutimit
në kohën e sundimit të perandorit Galerio Masimini e prindër të katër shenjtorëve:
ipeshkvijve Bazili i Madh, Gregori i Nisës e Pjetri i Sebastes si dhe të Shën Makrinës,
virgjër. Pastaj Benedikti XVI kujton Shenjtorët Jordani e Silvia, që patën ndikim
të fuqishëm mbi gjithë jetën e Shën Gregorit të Madh, papë. Kujton edhe të Lumen
Maria Tereza Ferragud Ruag, që pati katër vajza murgesha: të katërta të mbytura për
shkak të urrejtjes kundër fesë gjatë luftës civile spanjolle, në vitin 1936. Nëna
e tyre kërkoi të mbytej e fundmja, që t’u jepte zemër të bijave t’i qëndronin besnike
Krishtit deri në fund të fundit. E të gjitha vdiqën duke i falur vrasësit. Në
letrën papnore theksohet edhe shembulli i bashkëshortëve Beltrame-Kuatroki, që u shenjtëruan
duke jetuar si të krishterë të vërtetë me dashuri për njëri-tjetrin e për katër fëmijët,
që u fali Zoti, që të katërt të thirrur për jetë rregulltare. Së fundi Papa kujton
prindërit e Shën Terezës së Krishtit Fëmijë, të Lumët Luigji Martin e Zelia Guerin,
të cilëve iu desh të kalonin prova shumë të vështira. Patën nëntë fëmijë: katër u
vdiqën në moshë të njomë, të tjerët u prekën nga sëmundje të rënda fizike e psikologjike.
Shën Terezina thoshte: “Më mjafton të shikoj babain e nënën, për ta kuptuar si luten
Shenjtorët”.Por cilat janë qëllimet e këtij takimi botëror të familjeve, që do të
mbahet në Qytetin e Meksikos. Përgjigjet, në mikrofonin e Radio Vatikanit, kardinali
Enio Antoneli, kryetar i Këshillit Papnor për Familjen:
Përgjigje:
- Objektivat janë me drejtim kishtar, drejtpërdrejtë kishtar, objektiva
me karakter shpirtëror, si favorizimi i formimit, i lutjes, i pranimit të përgjegjësive
që ka familja e krishterë, edhe me kuptimin misionar të kësaj fjale. Pas Sinodit kushtuar
Fjalës së Hyjit, e atij të Aparesidës për Amerikën Latine me temë “Dishepuj e misionarë”
, ne duam t’i ftojmë familjet e krishtera të jenë më shumë dishepulle e më shumë
misionare. Pastaj kemi edhe drejtimin civil: në takim janë të ftuar edhe shumë përfaqësues
të politikës, nga mbarë bota, e kjo me qëllim që të favorizohet kultura, ndjeshmëria
politike, e cila mbron familjen, familjen e vërtetë, të themeluar mbi martesën, që
i do fëmijët e merret me edukimin e tyre. Në shumë vende, një nga problemet më dramatike
është pakësimi i vazhdueshëm i numrit të popullsisë. Familje pa djepa, djepa bosh!
Duam, prandaj, ta vemë këtë problem në qendër të vëmendjes të të gjithëve!