Presidenti Italian Napolitano i shkruan Papës: jam njëmendjeje me Ju për urgjencën
e politikave, që u rikthejnë dinjitetin të varfërve.
(02.01.2008 RV)Një letër, përmes
së cilës ‘shprehet vlerësimi i thellë për afërsinë njerëzore e ftesën për të shpresuar,
me të cilat Benedikti XVI – në mënyrë të veçantë në Mesazhin për Ditën Botërore të
Paqes - vlerësoi plagën e varfërisë dhe krizën ekonomike botërore. Këtë letër ia dërgoi
dje Papës, Presidenti i Republikës italiane, Gjorgjio Napolitano i cili, ashtu si
Benedikti XVI, mendon se është më se e nevojshme që politika të vihet në shërbim
të përmirësimit të nivelit të jetesës së një numri tepër të madh njerëzish, që përjashtohen
nga proceset e zhvillimit ekonomik. E këtë përkim mendimesh me Benediktin XVI, kreu
i Shtetit italian e ripohoi nga Napoli, duke theksuar: “Unë e Papa flasim nga tribuna
të ndryshme, por me një gjuhë të ngjashme”. E për rrugët në të cilat duhet ecur
për të përballuar varfërinë, flet në mikrofonin e Radio Vatikanit, kryeipeshkvi i
Peskara-Penne, Imzot Tomazo Valentineti, kryetar i ‘Pax Christi’:
Përgjigje:
- Besoj se më shumë se asnjëherë, në këtë çast duhet ta kemi mirë parasysh
se varfëria është realitet, që nuk mund të harrohet në asnjë mënyrë. Jugu i botës
e Veriu i botës ballafaqohen e nga ky ballafaqim del në pah realiteti i hidhur i jetesës
së disa njerëzve, që fundosen gjithnjë më thellë në mjerim. E nuk duhet harruar edhe
se paqja është një e mirë jashtëzakonisht e madhe, që lind sidomos nga një jetë e
qetë. Lind nga jeta e njerëzve që i gëzojnë të drejtat themelore – ndërmjet të cilave,
së pari, më duhet të kujtoj të drejtën për të ngrënë çdo ditë. Në këtë këndvështrim,
popujt e të ashtuquajturave ‘bota e tretë’ apo ‘ e katërt’, të cilëve u mohohen të
gjitha të drejtat – nganjëherë mund të kthehen në depo baruti, në burime të rrezikshme
dhune e konfliktesh, të cilat pastaj nuk dëshirojmë as t’i shikojmë, sepse na prishin
qetësinë. E kam fjalën për konfliktet e harruara, që mund të bëhen papritmas shumë
aktuale, sepse burime të gjalla terrorizmi e reagimesh të dhunshme. Që në enciklikën
Populorum Progessio, Pali VI pohonte parimin e madh: emri i paqes, është ndarja e
barabartë e burimeve natyrore; ndarja e barabartë e pasurive të tokës; e emri i paqes
është edhe zhvillimi i barabartë i të gjithë popujve. Nuk bënte tjetër, veçse t’i
hapte rrugën, disa vjet më përpara, tematikës që e bëri të vetën Benedikti XVI, duke
e përfunduar në një mënyrë tepër të qartë Mesazhin e tij të Paqes 2009. Mbetet një
e vërtetë e pakundërshtueshme aksioma, sipas së cilës, të luftosh kundër varfërisë,
do të thotë të ndërtosh paqen.
Pyetje: - Papa, një një paragraf,
kujton se, në këndvështrimin moral, meriton një vëmendje të dorës së parë lidhja
ndërmjet çarmatimit e zhvillimit. Me fjalë të tjera, paqja ndërtohet duke investuar
për zhvillimin e jo për prodhimin e armëve…
Përgjigje: - Në
Mesazhin e parë që botoi Benedikti XVI, i sapozgjedhur papë, preku menjëherë argumentin
e çarmatimit. Armatimet thithin energji e burime e këto dy aspekte të tjera të rëndësishme
preken edhe në dokument. Papa flet edhe për hendekun teknologjik, përjashtimin nga
flukset tregtare botërore dhe dinamikën e çmimeve, që i bëjnë edhe më të mëdha distancat
ndërmjet Veriut e Jugut. Ekziston, pastaj edhe shqetësimi për sëmundjet pandemike,
si malarja, tuberkulozi e Sida, të cilat bashkësia ndërkombëtare bën ende tepër pak
për t’i luftuar. Problematika e Sidës është në qendër të vëmendjes së Papës, i cili
kërkon që popujt e zhvilluar t’i ndihmojnë popujt e varfër për ta shëruar këtë plagë
të tmerrshme.