(28.12.2008 RV)Ish kulmi i dimrit. Era e akullt frynte nga stepa. E ngrinte
Ferishtja në shpellë, mbi shpatet e rrëpirta të kodrinës.
Fryma e kaut e
ngrohte. Dy kafshë që s’lëviznin fare frymonin në shpellë. Fryma që u dilte
prej hundëve, djepin e mbështillte me avull.
E atje larg, fusha nën dëborë,
e varreza e gardhet e gurët hepuar mbi varre, e rrota qerresh përgjysëm mbuluar e
mbi ta qielli qindisur me yje.
E aty pranë, çudi krejt e paparë, më e vogël
se një xixëllonjë, n’dritaren e mjerë të një kasollje, ndriçonte Ylli i Betlehemit.
Në
të njëjtën udhë, të njëjtat shtigje engjëjt shkelnin, ngatërruar me njerëz ishin
të patrup, të padukshëm, po këmba u linte gjurmë përmbi dëborë
Një turmë
mblidhej e shtyhej te shkëmbi. Agonte. E kedrat dilnin prej terrinash. ‘Po
ju kush jeni’- i pyeti Maria. “Ne, fis barinjsh e të dërguar nga qielli, erdhëm
ju të dyve t’ju këndojmë lumninë.
“Gjithë së bashku, s’mund të hyni. Prisni
në prak!”. Në mjegullën ngjyrë hiri, që i hap rrugën ditës, përplasnin këmbët
barinj e bagëti pranë trungut të zgavërrt ku rridhte kroi rresht prisnin mushka,
gomarë e deve.
Agonte. Prej kupës qiellore agimi pastronte si hirin në
votër, yjet e fundmë të natës. Prej turmës që priste, veç Tre Dijetarët, Zoja
i la të hynin në zemër të shkëmbit.
Ai flinte, plot dritë, në një grazh prej
lisi si rreze hëne në zgërbonjë të drurit të vjetër. Në vend të lëkurës së deles
e ngrohnin buzët e gomarit e hundët e kaut.
Tre Mbretërit, në terrin e shpellës më
kot kërkonin një fjalë. Papritmas dikush, në errësirë me dorë e shtyu paksa
njërin nga tre Dijetarët. Zemra e natës i shuente të gjitha flakët,po Ylli
i Krishtlindjes vinte në vizitë te Zoja.
Marrë nga ‘Natale in poesia’,
Antologia dal IV al XX secolo, Novara, 2006, fq 117