(25.12.2008 RV)28 tetor 1958. Turma në Sheshin e Shën Pjetrit në Romë bëhet
gjithnjë më e dendur. Pret emrin e Papës së ri, pasardhësit të Piut XII. Dhjetë
herë me radhë nga oxhaku i Pallatit të Vatikanit ka dalë tym i zi, shenjë që tregon
se kardinajtë nuk janë ende një mendjeje. Papritmas dikush tregon me gisht oxhakun
prej nga, më në fund, del tymi i bardhë, aq i pritur. Roma ka ipeshkvin e ri! Bota
katolike, papën. Kur turma merr vesh emrin e kardinalit të zgjedhur, mbetet krejtësisht
e habitur. Kush është ky Engjëll Ronkali? Nuk ishte fare në listën e kardinajve të
famshëm, atyre që mendohej se mund të bëheshin papë, të uleshin mbi fronin e Shën
Pjetrit. Kur një figurë e rrumbullaktë duket në ballkonin mbi Sheshin e Shën Pjetrit,
turma e shikon me mosbesim. Papa i ri duket njeri tepër i thjeshtë e nuk është aspak
i ri. Anxhelo Ronkali vjen nga një familje fshtarësh e tashmë i ka kaluar shtatëdhjetë
e shtatë vjetët. Njerëzit, shtypi, bota mbarë, mendojnë se është papë kalimtar, i
zgjedhur sepse nuk u gjet një tjetër, më i mirë. Por gabohen, e rëndë... Gjoni
XXIII i çudit shumë shpejt të gjithë. Nuk duket se i vë rëndësi ceremonive që rrethojnë
personin e tij e sillet me një natyrshmëri çarmatosëse. Një ditë prej ditësh paraqitet
në L’Osservatore Romano, gazetë zyrtare e Vatikanit, për të përtëritur gjuhën artificiale
të gazetarëve. Mjaft më me shprehje si ‘i ndriçuari Ati i Shenjtë’, ose ‘buzët auguste
të papës sovran’. Gjonit XXIII i pëlqen thjeshtësia. Tani e tutje duhet thënë “papa
tha këtë e këtë tjetrën e mjafton me kaq, pa shprehje të përfryra të zbrazta, që të
mërzisin”. Papa kërkon të kuptohet nga të gjithë. Shkon t’i takojë fëmijët e shtruar
në spital për Krishtlindje; bisedon shtruar me kopshtarët e me punëtorët e Vatikanit.
Shumë shpejt, me thjeshtësinë e ëmbëlsinë e tij, fiton zemrat e të gjithëve, popullit
e besimtarëve, të cilëve u prin si kryebari, Për të, “papa është bariu i mirë, që
çon përpara misionin e vet; e ky mision është të përhapë kudo mirësinë”. Me sjelljen
e veprimtarinë e tij, Gjoni XXIII dëshiron t’i japë një frymëmarrje të re Kishës.
Më 25 janar 1959 njofton se do të mbledhë një koncil për të rinuar fytyrën e Kishës.
Projekti i Koncilit II të Vatikanit është vetëtimë në qiell të kthjelltë. Por kjo
s’ka pikë rëndësie për Gjonin XXIII, që nuk i tutet vërejtjeve. E kur i thonë se koncili
mund të hapet vetëm më 1963, për shkak se duhen përgatitje të gjata e të domosdoshme,
përgjigjet: “E po mirë, do të thotë se do ta hapim më 1962!”. Dhe e mban premtimin!