Solidariteti e familja në qendër të fjalimit të Papës drejtuar ambasadorit të ri të
Sejshelit.
(19.12.2008 RV)Familjet kanë vazhdimisht
nevojë të inkurajohen e të ndihmohen nga pushteti publik: janë fjalët e Benediktit
XVI në audiencën me ambasadorin e ri të Republikës së Sejshelit, zotin Graciano Luigji
Tribaldi, me rastin e paraqitjes së Letrave kredenciale.Papa kujtoi edhe bukuritë
e natyrës së Sejshelit si dhe kërkesën për kufizimin e borxheve, pa harruar të vlerësojë
impenjimin e autoriteteve të vendit për zhvillimin, duke kufizuar njëkohësisht borxhin
e jashtëm. Prandaj nënvizoi se këto përpjekje pozitive duhen mbështetur nga institucionet
ndërkombëtare. Benedikti XVI vijoi të kujtonte se rrethanat ndërkombëtare po bëhen
gjithnjë më të vështira, gjë që kërkon jo vetëm normalizimin e ekonomisë, por edhe
zgjidhjen e nyjeve të drejtësisë shoqërore në favor të të varfërve. E Papa vuri në
plan të parë pikërisht konceptin e solidaritetit, duke shpjeguar se ka solidaritet
shoqëror, e është ai që lidhet me masat ligjore e me strukturat shtetërore, por ka
dhe solidaritet individual, e është ai i çdo njeriu, që është i thirrur të punojë
për të mirën e përbashkët. E më pas Ati i Shenjtë theksoi se për të promovuar ndjenjat
e vërteta të solidiaritetit, duhet konsideruar si themelor edukimi i të rinjve, gjë
që qeveria e Sejshelit e vë gjithnjë në plan të parë, me vetëdijen se duke edukuar
të rinjtë, mbillet fara e ardhmërisë solidare.