7 снежня 2008 г., у ІІ Нядзелю Адвэнту, адбылася цырымонія ўрачыстага ўнясення рэліквій
бл. Цэліны Бажэнцкай у капліцу Божай Міласэрнасці ў Свіслачы (Бераставіцкі дэканат).
Цырымонію ўзначаліў ардынарый Гродзенскай дыяцэзіі біскуп Аляксандр Кашкевіч.
Урачыстаму
ўнясенню рэліквій папярэднічала навэнна і трохдзённыя адвэнтавыя рэкалекцыі, якія
правёў а. Віктар Занеўскі SChP. У гэтыя дні сваёй прысутнасцю і малітвай рыхтавацца
да ўрачыстасці дапамагалі сёстры з Кангрэгацыі Сясцёр Змёртвыхпаўстанак, заснавальніцай
якога з’яўляецца бл. Цэліна Бажэнцкая. Благаслаўлёная Цэліна Бажэнцкая, асабліва
блізкая мясцовым вернікам, бо некаторы час яна жыла на гродзеншчыне ў Абрэмшчыне.
27
кастрычніка 2007 г. мы цешыліся далучэннем Цэліны Бажэнцкай да ліку благаслаўлёных,
а ўжо сёння ўшаноўваем рэліквіі бл. Цэліны ў капліцы ў Свіслачы, якая знаходзіцца
на тэрыторыі квасоўскай парафіі Беззаганнага Зачацця Найсвяцейшай Панны Марыі.
Пасля святой Імшы біскуп Аляксандр прачытаў малітву аб атрыманні ласк праз заступніцтва
бл. Цэліны і асвяціў яе абраз, пасля чаго вернікі ўшанавалі рэліквіі благаслаўлёнай
з іх зямлі.