Programi i kremtimeve të Krishtlindjes, që do të kryesohen nga Papa Benedikti XVI

(16.12.2008 RV)U bënë të njohura kremtimet e periudhës së Krishtlindjes, në të cilat do të marrë pjesë Papa Benedikti XVI. Si zakonisht, Natën e Krishtlindjes, më 24 dhjetor, në mesnatë, në Bazilikën e Vatikanit, Ati i Shenjtë do të kremtojë Meshën Solemne të Lindjes së Krishtit. Të enjten, më 25 dhjetor, dita e Krishtlindjes, Papa Racinger do t’i drejtojë krejt botës mesazhin e tij dhe do t’u japë të gjithëve bekimin “Urbi et Orbi” nga Lozha qendrore e Bazilikës së Shën Pjetrit, në mesditë.
Do të fillojnë më pas festat e Vitit të Ri. 31 dhjetori është dita e fundit e vitit 2008, por edhe nata e Solemnitetit të Shën Marisë, Nënës së Zotit. Në orën 18 në Bazilikën e Vatikanit, Benedikti XVI do të kremtojë Lutjet e para Mbrëmësore të këtij Solemniteti. Më pas, do të adhurohet i Shenjtnueshmi Sakrament, do të këndohet himni tradicional “Te Deum”, që mbyll vitin dhe do të jepet bekimi eukaristik. Të enjten, më 1 janar 2009, në ditën e parë të vitit të ri, festë e shën Marisë, Nënës së Zotit dhe Ditë Botërore e paqes, Papa do të kremtojë Meshën në orën 10, gjithnjë në Bazilikën e Vatikanit. Është bërë i njohur tashmë edhe mesazhi i tij për këtë ditë, që sivjet ka si temë: “Të luftojmë varfërinë, të ndërtojmë paqen”.
Do të jetë sërish Ati i Shenjtë, që në ditën e Dëftimit të Zotit, e cila ndër shqiptarë njihet edhe si dita e Ujit të Bekuar, të martën më 6 janar, do të kremtojë Meshën Solemne. Kremtimet e Krishtlindjes përfundojnë me festën e Pagëzimit të Krishtit, të dielën, 11 janar. Benedikti XVI do të kryesojë Meshën në Kapelën Sikstine, në orën 10, gjatë së cilës do të pagëzojë disa fëmijë.