14.12.2008 RV)Koha e t’Ardhunit tashmâ âsht në gjysen e udhtimit të vet. Liturgjija
e shef Krishtin kah afrohet dhe shpërthen në gëzim e brohoritë: “Gëzonju përherë në
Zotin, rishtas po u thom: Gëzonju, përsè Zoti âsht afër”(Antifona e të Hymit). Per
të bâ qi gëzimi, i cili Këshndellash duhet t’i mbushë zemrat tona, të jetë i plotë,
Kisha na flet sot me fjalët e Shën Palit: “Mos u ngushtoni për kurrgjâ, por ndër të
gjitha nevojët- qi të keni, çfaqnja Hyut dishiret tueja…npër Jezu Krishtin, Zotin
tonë (Letra)”. Vetëm Krishti âsht gurra e pashterrëshme e gëzimit e e paqës.
Mjerisht bota, e me tê shum ndër të krishtênë, s’e njofin ketë gurrë. T’etshëm për
ujët e hirit, të marrun syshë prej territ, të lodhun prej udhtimit në shkretí të veseve,
ku rrezet zharritse djegin, thajnë e shkrumbojnë, s’afrohen te Krishti qi âsht Rruga,
e Vërteta, Jeta, Paqa e Gëzimi. Për ta zâni i Shën Gjonit Pagëzues: “Në mes jush jeton
ai, të cilin ju s’e njifni (Ungjilli)” âsht zâni i hirit hyjnuer. Krishti
zhdavaritë terrinat e mendes (Lutja), freskon zemrën dhe përtrin shpirtin e
lodhun, libron prej verigave të mëkatit, falë të fyemet (Kushtesa), ep zemër
e ngjall të ligështit qi atij i pështeten (Antifona mbas Kungimit). I
krishtênë, hapja Shëlbuesit dyert e zemrës sate; lutu qi Krishti të falë tý e familjes,
ashtu si edhe mbarë njerzimit, paqën e jetën e mbinatyrëshme të hirit. Gatoju shpirtnisht
Këshndellave e bân qi të Lémt e Shëlbuesit të jetë për tý gurra e atij gëzimi, të
cilin e paralajmon Liturgjia e kësaj Meshe.
Meshari i të kremteve, Perkthye
dhe zhvillue prej At Danjel Gjeçajt OFM, fq. 18-19, Romë 1966