U paraqit Mesazhi i Benediktit XVI për Ditën Botërore të Paqes 2009. Në fillim të
vitit, edhe botimi i një enciklike shoqërore të Papës
(11.12.2008 RV)U paraqit sot në
Sallën e Shtypit të Vatikanit, Mesazhi i Papës Benedikti XVI për Ditën Botërore të
Paqes 2009, me titull “Të luftojmë varfërinë, të ndërtojmë paqen”. “Në botën
aktuale globale, është gjithnjë e më e qartë, se ndërtohet paqja vetëm nëse u sigurohet
të gjithëve mundësia e një zhvillimi të arësyeshëm: në fakt, shtrembërimet e sistemeve
të padrejta, herët a vonë, u paraqesin llogarinë të gjithëve”. Kjo është teza
themelore e Mesazhit të Atit të Shenjtë për ditën e 1 janarit 2009, Dita e 42-të Botërore
e Paqes, paraqitur sot në praninë e krerëve të Këshillit Papnor për Drejtësinë e Paqen,
kardinalit Renato Rafaele Martino dhe imzot Xhampaolo Krepaldit. Tezë, që do të zgjerohet
më tej në Enciklikën shoqërore, të cilën Benedikti XVI do ta botojë në fillim të vitit
2009. Teksti analizon aspekte të ndryshme të situatës aktuale botërore. Përsa
i përket krizës financiare, Papa vë në dukje se “financa e e kufizuar vetëm në afate
të shkurtra ose shumë të shkurtra bëhet e rrezikshme për të gjithë, edhe për ata që
arrijnë të përfitojnë prej saj në fazat e euforisë financiare”. Më pas, Ati i
Shenjtë shpjegon se nuk është më e vërtetë se për të favorizuar paqen, duhet përgatitur
lufta. Në fakt, rritja përtej arësyes e shpenzimeve për armatimin pa dyshim bëhet
në dëm të shpenzimeve shoqërore, prandaj, “shkakton gjendje nënzhvillimi e dëshpërimi,
duke u shndërruar kështu paradoksalisht, në faktor paqëndrueshmërie, tensioni dhe
konflikti”. Kardinal Martino, gjatë paraqitjes së Mesazhit në Vatikan, sqaroi: “Ati
i Shenjtë i fton shtetet të bëjnë autokritikë të sinqertë. Kërkesë e arësyeshme, pasi
shpenzimet ushtarake botërore në vitin 2007 kanë qenë 1339 miliard dollarë”. Me
pasion të madh, Benedikti XVI flet për problemin demografik, duke kritikuar ashpër
mendimin se rritja e popullsisë shkakton zvogëlimin e burimeve natyrore dhe si rrjedhojë,
varfërimin e personave. Nuk është kështu, thekson me forcë Ati i Shenjtë, “kanë dalë
nga varfëria, popullsi që karakterizohen nga një rritje e madhe demografike”, madje,
“vendet që kohët e fundit po thonë me forcë fjalën e tyre në skenën ndërkombëtare,
si fuqi të reja ekonomike, janë zhvilluar me shpejtësi, pikërisht në sajë të numrit
të madh të banorëve”. Shfarosja e miliona fëmijëve përmes abortit, në emër të luftës
kundër varfërisë – denoncon – përbën në të vërtetë eliminimin e më të varfërve nga
gjiri i njerëzimit. I njëjti arësyetim vlen edhe për luftën kundër Sidës, sëmundje
që rëndon mbi gjendjen e vështirë ekonomike të shumë vendeve, duke kërcënuar kështu
paqen. Për të fituar mbi Sidën, thekson Papa Racinger, “duhen vënë në dispozicion,
edhe të popujve të varfër, ilaçet dhe kurat e nevojshme; kjo supozon nxitjen e punës
kërkimore-shkencore në fushën e mjekësisë dhe risi në fushën terapeutike e madje,
kur është e nevojshme, heqjen dorë nga rregullat ndërkombëtare të mbrojtjes së pronësisë
intelektuale, që t’u garantohet të gjithëve mjekimi shëndetësor bazë”. Gjithsesi,
Ati i Shenjtë pranon se përpjekjet për të ndalur pasojat e sëmundjeve, si Sida, malaria
e tuberkulozi, mbi popullsinë, jo gjithnjë arrijnë rezultate pozitive. “Ndodh – vë
në dukje Papa – që vendet viktima të ndonjërës prej këtyre pandemive, për t’i përballuar,
u duhet të pësojnë shantazhin e atyre që e kushtëzojnë dhënien e ndihmave me zbatimin
e politikave kundër jetës”. Në të vërtetë, arësyeton Shenjtëria e Tij, “nuk mund të
luftohet Sida, shkak dramatik i varfërisë, nëse nuk përballohen problemet morale me
të cilat është e lidhur përhapja e virusit: duhet të bëhen fushata, të cilat edukojnë
sidomos të rinjtë me një seksualitet, që i përgjigjet dinjitetit të personit. Iniciativa
të tilla kanë dhënë tashmë fryte domethënëse, duke zvogëluar përhapjen e Sidës”. Pra,
për të ndërtuar paqen, Papa kërkon me forcë që të njihet e vërteta, pavarësisht se
shpesh nuk e lë të qetë ndërgjegjen, duke u kujtuar të gjithëve, për shembull, se
siç citoi kardinal Martino, duke iu referuar mendimit të Benediktit XVI për “krizën
ushqimore”: “Ajo krizë karakterizohet jo aq nga pamjaftueshmëria e ushqimit,
sa nga mungesa e institucioneve politike dhe ekonomike, të cilat nuk janë në gjendje
të përballojnë nevojat dhe emergjencat”. Ç’duhet bërë? Globalizimi – pohon
Ati i Shenjtë – duhet të udhëhiqet nga solidariteti, sepse “i vetëm nuk është i aftë
të ndërtojë paqen, e në shumë raste, madje, krijon ndarje e konflikte”. Duhet luftuar
kundër kriminalitetit, investuar në formimin e personave, në mënyrë që ata vetë të
shkojnë natyrshëm drejt një kulture, që u mëson si të marrin iniciativën e bashkë
me të, si të marrin në dorë fatin e jetës së tyre. Politikat krejtësisht asistencialiste
– kritikon Papa Racinger – janë në zanafillën e dështimit të ndihmave ndaj vendeve
të varfëra. Më tej: i duhet dhënë më shumë hapësirë shoqërisë civile, por thekson
Shenjtëria e Tij, në fund të fundit, lufta kundër varfërisë ka nevojë për burra e
gra, që e jetojnë thellësisht frymën vëllazërore e që shohin tek të varfërit, fytyrën
e Krishtit. Koncept ky, i sqaruar mirë nga kardinali Martino, gjatë paraqitjes
së Mesazhit për Ditën botërore të Paqes 2009, në Sallën e Shtypit të Vatikanit: “Braktisja
e të varfërve të planetit dhe kushtet e trishtuara të ekzistencës së tyre mund të
gjejnë tek globalizimi mjete të vlefshme për zgjidhje, vetëm nëse çdo person do t’i
ndjejë ato padrejtësi e ato dhunime të të drejtave të njeriut sikur t’i kishte pësuar
vetë”.