(30.11.2008 RV)Sot Kisha katolike
kremtoi të Dielën I të Kohës së Ardhjes. Përkujtoi edhe Shën Andreun.
Të
hënën do të kremtohet festa e Shën Eligjit, ipeshkëv i Lionit dhe Shën Naumit,
profet, që na kujtojnë se Jezusi vjen për çdo njeri, për çdo popull: të përgatitemi,
prandaj, për ta takuar me gëzim.
Të marten, në atmosferën e thirrjes
së Psalmistit: ‘Eja, o Zot, mbret i drejtësisë e i paqes”, do të përkujtohen Shën
Bibiana, matronë romake; Shën Pimeni, martir e Shën Silvestri, papë.
Të
mërkurën është festa e Shën Françesk Saverit, meshtar jezuit, apostull i Indisë,
pajtor i misioneve. Na kujton se kumtimi ynë i krishterë bëhet i besueshëm, kur e
dëshmojmë Krishtin me çdo çast të jetës sonë. Dëshmi, jo fjalë, kërkon nga ne Zoti
që vjen!
Në liturgjinë e së enjtes, Shën Gjon Damasheni, meshtar
e dijetar i Kishës e Shën Barbara, martire, na ftojnë që jo vetëm t’i dëgjojmë fjalët
e Jezusit, por edhe e sidomos t’i vemë në jetë.
Të premten - festa e
Shën Sabës abat, na kujton se duhet të jetojmë me bindjen se kushti kryesor për ta
përhapur praninë e Zotit në botë, është të besosh me gjithë zemër në Të.
Të shtunën Kisha na propozon shembullin e Shën Nikollës së Barit, ipeshkëv
i Mirës. Shenjti mrekullibërës na kujton se kur jemi të lodhur e të këputur, si delet
pa bari, duhet t’i lutemi Hyjit të na dërgojë prijës të drejtë, të cilët na çojnë
drejt Zotit që po vjen!
E diela e ardhshme, është e dyta e Kohës
së Ardhjes.