Papa Kongregatës për jetën rregulltare: “Manastiret ta mësojnë botën si ta kërkojë
Zotin.
(21.11.2008 RV)Manastiret janë
oaza shpirtërore. I tregojnë botës atë që është themelore: “Të kërkojë Krishtin, pa
e kundërshtuar kurrë dashurinë e tij”. Këtë pohoi sot paradite Papa, duke pritur në
audiencë pjesëmarrësit në mbledhjen plenare të Kongregatës për Institutet e jetës
rregulltare dhe Shoqatat e jetës apostolike, e cila sivjet kremtoi njëqind vjetorin
e veprimtarisë. Tema e Plenares së dikasterit i kushtohej jetës murgare, posaçërisht
e dashur për Benediktin XVI. E pikërisht për vlerën e jetës murgare në histori foli
Papa, duke nënvizuar qëllimin e saj…: “të kërkojë Hyjin
e ta kërkojë përmes Jezu Krishtit, që e bëri të njihet në botë (cfr Gjn
1,18), duke u përpjekur ta ngulë vështrimin mbi realitetet që nuk shihen,
që janë të përjetshme (cfr. 2 Kor 4,18), në pritje të ardhjes
së lumnueshme të Shëlbuesit tonë Jezu Krishtit ( cfr Tt 2,13)”.
Manastiret bëhen oaza shpirtërore, që i tregojnë njerëzimit
epërsinë e plotë të Hyjit, në adhurim të vazhdueshëm të pranisë hyjnore, misterioze
por reale, në botë e në bashkim vëllazëror, të jetuar sipas urdhërimit të ri të dashurisë
e të shërbimit reciprok, duke përgatitur kështu dukjen përfundimtare të bijve të
Hyjit:
“Kur murgjërit e jetojnë rrënjësisht Ungjillin, kur i kushtohen
plotësisht jetës kundruese, duke kultivuar thellësisht bashkimin me Krishtin… monakizmi
bëhet shembull për të gjitha format e jetës rregulltare e të përkushtuar, duke treguar
atë që është themelore e që ka më shumë epërsi në jetën e çdo të pagëzuari: të kërkosh
Krishtin e të mos e kundërshtosh kurrë dashurinë e Tij”. Rruga
që na tregon Zoti për këtë kërkim e për këtë dashuri – vijoi Benedikti XVI – është
vetë Fjala e tij, e cila në Librat e Shkrimit të Shenjtë krijon mundësi të pafundme
reflektimi për të gjithë njerëzit. E pikërisht duke u nisur nga dëgjimi në uratë i
kësaj Fjale, në manastire lind heshturazi lutja, e cila bëhet dëshmi për ata që priten
si të ishin vetë Krishti në këto vende paqeje e lartohet drejt qiellit për të mirën
e mbarë njerëzimit.
“T’i lutemi Marisë, gruas së dëgjimit, Nënës
së Zotit, që nuk e kundërshtoi kurrë dashurinë e Birit të Hyjit, të lindur prej Saj,
t’i ndihmojë bashkësitë e jetës rregulltare e posaçërisht ata murgare, për t’i qëndruar
besnike thirrjes së tyre. Uroj që manastiret të jenë gjithnjë më shumë oaza të jetës
asketike, ku ndjehet tërheqja e fuqishme e bashkimit të plotë me Krishtin e ku zgjedhja
e Absolutit të Hyjit rrethohet me atmosferën e përhershme të heshtjes e të kundrimit”.