(17.11.2008 RV)Afrika, një kontinent që zë vend në faqet e gazetave perëndimore
vetëm për luftrat, urinë, varfërinë, duke ushqyer kështu stereotipe, që fshehin pasurinë
e gjallërinë e saj të vërtetë. Kësaj teme iu kushtua një seminar, që u zhvillua në
Firence të Italisë, për të gjithë gazetarët e veprimtarët shoqërorë. Qëllimi është
që informacioni mbi Afrikën të jetë gjithnjë e më i vërtetë e më i drejtë. Të dëgjojmë
Lilianë Mugombocin, një gazetare kongoleze që punon në Itali: Mediat nuk vënë
në dukje gjërat e mira e të vlefshme, që janë bërë. Shpesh kërkojmë më shumë lajme,
por jo gjithnjë janë lajme, që ndihmojnë të ecim përpara. Në Kongo, për shembull,
sapo shpërthen një tragjedi flasin të gjithë. Mbetet që Afrika të jetë vetëm kjo.
Është e vërtetë që vuajmë, por edhe gëzojmë, përpiqemi të ndërtojmë një të ardhme
më të mirë. Mediat mund të ndihmojnë që kulturat, popujt të takohen vërtet, të jenë
takime ku personi vlerësohet për atë që është. Mbi këtë, ndërtohet më pas diçka tjetër.
Kjo ndodh, kur besojmë tek njeriu.