365 ditë: "Divini Redemptoris, letra e Papës kundër komunizmit".
(17.11.2008 RV)“Mirëmëngjes, zoti
mësues!”. Mësuesi i hedh një shikim të akullt famullitarit. “Hë, t’i lëmë këto!
Apo e keni ndër mend të më mbani inat deri në vdekje? E di mirëfilli pse nuk denjoheni
më as të më flisni. Papa ynë, Piu XI, në mars të vitit 1937 shkroi Divini Redemptoris,
një letër të gjatë kundër komunizmit. E me që ju jeni komunist, jeni zemëruar me Papën
e edhe me mua. E kështu keni vendosur të mos më flisni më, madje nuk pranoni as
t’ju sqaroj”. “Papa juaj po sulmon ide fisnike e bujare. Ç’gabim i rëndë! E unë
i vafëri mendoja se Piu XI ishte njeri me mend në kokë. Kur dënoi fashizmin e Musolinit
e nazizmin e Hitlerit, isha plotësisht me të, siç e dini edhe ju vetë. Por duhet
pranuar se më pas ka shkruar një tog marrëzirash”. “Papa do t’ua hapë sytë njerëzve”. “M’i
hapka sytë, e pastaj. Ç’shikoj? Një botë të padrejtë, me të pasur e të varfër. Komunizmi
dëshiron ta ndryshojë këtë jetë kaq të padrejtë, dëshiron që të gjithë të jenë të
barabartë. Në komunizëm asnjeri s’ka pronë personale, sepse gjithçka është e përbashkët.
Jep sa mundesh e merr sa të nevojitet. Komunizmi do të ndërtojë një botë më të mirë.
Vetëm një gjë mund të mos ju pëlqejë: ne nuk besojmë në Zotin! Prandaj papa na i kërcëllon
dhëmbët. Ç’intolerancë e turpshme!”. “Nuk është vetëm ky shkaku i letrës, jooo!
Natyrisht Papa mendon se një botë pa Zot nuk mund të funksionojë. Por është edhe një
gjë tjetër. Komunistët përpiqen t’i bëjnë për vete njerëzit me fjalimet e tyre të
bukura, e boshe!”. “Ç’do të thuash me këtë?”. “ Me pretekstin e vendosjes së
barazisë, komunizmi zhduk çdo mendim të lirë. A s’e shikon ç’po ndodh në Bashkimin
Sovjetik. Stalini, kreu i shtetit, po i shndërron njerëzit në kukulla, që lëvizin
sipas komandës së tij. Në këtë vend nuk ka më liri, nuk ka jetë private, nuk ka opinione
personale. S’ka as rrugë të mesme: o bën ç’thotë Stalini, o vdes. E ju po na e akuzoni
Papën për intolerancë?! Në sa është krejt e kundërta: Papa dëshiron vërtetë që të
gjithë njerëzit të jenë të lirë. Ne jemi bij të Hyjit, e jo kukulla dërrase!”. “Jemi
a s’jemi bij të Zotit, këtë nuk e di, i nderuar, por që nuk jemi kukulla, këtë e di
mirë...”. “Ja, pra, e shikon! Në fund të fundit jemi gjithnjë dakord”, përgjigjet
famullitari me një të qeshur të ngarkuar me ironi. Në këtë periudhë, para luftës,
Piut XI i duhet t’u kundërvihet ideve dhe veprimtarive të tmerrshme, që vihen në jetë
në emër të ideologjive njerëzore, naziste a komuniste qofshin. Nuk ngurron t’i denoncojë
rreziqet që kërcënojnë botën. E, për fat, të keq, historia do t’i japë arsye.