Ծիսական ժամանակացոյց –
Այսօր երկուշաբթի 3 Նոյեմբեր 2008 Ս. Ստեփանոս՝ Հռոմի
Հայրապետի տօնն է, եւ միաժամանակ քահանաներու, սարկաւագներու եւ ժողովրդոց յիշատակութեան
օր
Ս. Ստեփանոս Հայրապետը ծնած է Հռոմ, որու եպիսկոպոսը եղած էր 254 թուականին: Ան եղած է Հռոմի Լուկիոս Ա. նահատակ պապի աւագ սարկաւագը` վերջինիս մահէն յետոյ յաջորդած է անոր: Ըստ հայոց «Յայսմաւուրք»-ի` ան քաջ և իր հօտի համար նախանձախնդիր Հայրապետ եղած է` քաջալերելով իր հաւատացեալ հօտը հալածանքներու ժամանակ, որպէսզի անոնք ալ աւելի հաստատուն մնան իրենց հաւատքի մէջ: Հեթանոսներէն շատերուն դարձի բերած էր, որոնցմէ էր նաեւ Նեմեսիոս իշխանը եւ իր կոյր դուստրը: Այս վերջինները մկրտելէ ետք իշխանի դստեր աչքերը բացուեցան։ Նեմեսիոս իշխանը տեսնելով հրաշքը, խնդրեց Հայրապետէն, որ զինք սարկաւագ ձեռնադրէ: Կայսրը, իմանալով այս լուրը , իր մօտը կանչեց իշխանը` հրամայելով անոր որ կուռքերուն զոհ մատուցանէ: Սակայն իշխանը մերժած է կայսեր առաջարկը, որու համար նահատակուեցաւ ինք եւ իր դուստրը: Անոնց հետ նահատակուած է ուրիշ իշխան մը ևս իր մատակարարներով, որոնք նոյնպէս բարեպաշտ քրիստոնեաներ էին: Ըստ «Յայսմաւուրք»-ի զինուորները ձերբակալած են 12 եկեղեցականներ և չարաչար սպաննած են զանոնք։ Եւ այս երանելիներու յիշատակն է, որ եկեղեցին միացուցած է Ս. Ստեփանոս Հայրապետի տօնին: Օր մը, երբ Ս. Ստեփանոս Հայրապետը Ս. Պատարագ կը մատուցանէր, զինուորները պաշարեցին եկեղեցին և փորձեցին ջախջախել դուռը: Այդ պահուն Հայրապետը Ս. Հաղորդութիւն կը բաշխէր ներկայ հաւատացեալ բազմութեան: Հաղորդութենէն ետք զինուորները խուժեցին եկեղեցի և սպաննեցին Հայրապետը 257 թուականին:
| All the contents on this site are copyrighted ©. |