Dhimbje e thellë në Kishë, për vrasjen në Moskë të dy jezuitëve, atë Oto Mesmer e
At Viktor Betankur.
Kisha katolike ruse dhe Shoqëria e Jezuitëve po përjetojnë një tronditje të thellë,
shkaktuar nga vrasja e dy jezuitëve. Trupi pa jetë i Atë Oto Mesmer, nënshtetas rus,
lindur më 1961 në një familje katolike me origjinë gjermane e i Atë Viktor Betankur,
lindur më 1966 në Ekuador, u gjetën në një apartament në qendër të Moskës. Burimet
e policisë njoftojnë se dy etërit jezuitë vdiqën pas goditjeve në kokë dhe plagëve
të shkaktuara nga therjet me thikë. Sipas Atë Igor Kovalevskit, sekretar i përgjithshëm
i Konferencës së ipeshkvijve katolikë të Rusisë, kjo është një vrasje barbare, që
i shkakton një humbje të ndjeshme Kishës katolike në Rusi. Ndërsa Eprori i përgjithshëm
i Shoqërisë së Jezusit, Atë Adolf Nikolas, i fton të gjithë jezuitët të luten e t’i
ngushëllojnë me solidaritein e tyre, sivëllezërit e Rusisë, që humbën dy barinj të
zellshëm e shumë të dashur nga besimtarët. Kisha lutet për shpirtrat e tyre – shton
Atë Nikolas- por edhe për ata që e kryen këtë krim kaq të shëmtuar, që Zoti t’u japë
hirin e pendesës.Ndërkaq – sipas njoftimit të drejtorit të Sallës vatikanase të Shtypit,
Atë Federiko Lombardi – policia vijon hetimet për vrasjen që, me sa duket, mund të
ketë ndodhur nga fundi i javës së kaluar.