Dje, në lutjen e Engjëllit të Tënzot, Papa bëri thirrje për të krishterët e Indisë
e të Irakut.
(27.10.2008 RV)Në lutjen e Engjëllit të Tënzot, kremtuar në Sheshin e Shën
Pjetrit, përplot me besimtarë, Benedikti XVI rikujtoi punimet e Sinodit dhe rëndësinë
e ekzegjezës biblike, të bazuar si mbi metodën historiko-kritike, ashtu edhe mbi atë
teologjike. Pastaj Ati i Shenjtë bëri një thirrje të fuqishme për paqe e për liri
fetare në mbarë botën, duke kujtuar posaçërisht persekutimin e të krishterëve të
Indisë e të Irakut, të cilët bota nuk duhet e nuk mund t’i harrojë:
“Në
përfundim të Asamblesë sinodale, Patrikët e Kishave Lindore i drejtuan një thirrje,
që e bëj timen, bashkësisë ndërkombëtare, prijësve fetarë e të gjithë burrave e grave
vullnetmira, duke u kujtuar tragjedinë që vijon në disa vende të Lindjes, ku të krishterët
janë viktima të intolerancës e të dhunës së egër, ku vriten, kërcënohen e detyrohen
të braktisin shtëpitë e tyre e të ravgojnë në kërkim të një strehe. Mendoj këtë çast
posaçërisht për Irakun e Indinë”.
Duke kujtuar kontributin
që bashkësitë e vogla, por të kualifikuara të krishtera, japin për zhvillimin e atdheut
të përbashkët, Papa ripohoi, më pas, se ata nuk kërkojnë privilegje. E vetmja gjë
që kërkojnë, është të vijojnë jetën në vendin e tyre së bashku me të gjithë nënshtetasit
e tjerë:
“Autoriteteve civile e fetare të interesuara, u kërkoj të mos
kursejnë asgjë në përpjekjen që të rivendosen ligjshmëria e bashkëjetesa civile dhe
që qytetarët e ndershëm e të drejtë ta dinë se mund të gëzojnë mbrojtjen e nevojshme
nga ana e shtetit. Uroj, pastaj, që krerët civilë e fetarë të të gjitha vendeve,
të vetëdijshëm për rolin e tyre udhëheqës, të bëjnë përpjekje të dukshme që shprehin
miqësinë e konsideratën për pakicat, të krishtera ose të besimeve të tjera, e ta konsiderojnë
çështje nderi mbrojtjen e të drejtave të tyre të ligjshme”.