Papa: Kisha katolike e ka për detyrë të ndërhyjë, me vlerësimin e gjykimin e vet moral,
në tema politike e morale që prekin dinjitetin e jetën e njeriut.
(16.10.2008 RV)Kisha katolike e ka për detyrë të ndërhyjë, me vlerësimin e
gjykimin e vet moral, në çështjet politike që kanë të bëjnë në mënyrë të veçantë me
dinjitetin e personit, me sakralitetin e martesës në mbrojtje të jetës njerëzore.
Këtë ka ripohuar Papa Benedikti XVI, në takim me ipeshkvijtë e Ekuadorit, të cilët
i priti sot paradite në Vatikan, me rastin e vizitës së tyre ‘ad Limin Apostolorum’. “Megjithëse
aktiviteti i Kishës nuk mund të ngatërrohet (pështjellohet) me impenjimin politik
– shpjegoi Papa Racinger – ajo duhet t’i ofrojë bashkësisë njerëzore kontributin e
vet që është në natyrën e saj, përmes reflektimeve e gjykimit moral, duke përfshirë
këtu edhe çështjet politike, në mënyrë të veçantë ato që i përkasin dinjitetit të
njeriut”. Në veçanti, Papa përmendi “ promovimin e stabilitetin e familjes,
të themeluar sidomos mbi lidhjen e dashurisë ndërmjet burrit e gruas, mbrojtjen e
jetës njerëzore që nga çasti i parë i ngjizjes deri tek mbarimi i saj natyror, siç
është përgjegjësia e prindërve në edukimin moral të fëmijëve të tyre”. Udhëzimet
e Benediktit XVI, megjithëse kanë vlerë të përgjithshme, në mënyrë të veçantë i referohen
situatës së Ekuadorit, ku Kisha katolike është e angazhuar në kundërshtimin e projektit
të reformës kushtetuese, e cila – sipas ipeshkvijve të Vendit – hapet edhe matej ndaj
formave të ndryshme të martesës e ndaj lejimit të abortit. Po kujtojmë se Ekuadori
është Vendi më i varfër i Amerikës Latine, ku kohëve të fundit janë regjistruar turbullira
sociale e politike, që sollën në zgjedhjet e nëntorit 2006. Ekuadori ka 13 milionë
e gjysmë banorë, mbi 90 për qind e të cilëve janë katolikë.