Çmimi Nobel për letërsinë: francezit Jean-Marie Gustav Le Clézio
(09.10.2008 RV)Akademia e Stokholmit
shpalli sot Çmimin Nobel për letërsinë: ndërmjet disa kandidatëve të njohur, fitoi
francezi Jean-Marie Gustav Le Clézio. Shkrimtari, i lindur në Nicë në vitin
1940, nisi të shkruajë që në moshë të njomë, 7– 8 vjeçe. Sot, që është 68 vjeç, ka
më se 30 vepra të botuara (libra, përralla, sprova e novela), që e bënë shumë të njohur
në Francë e në mbarë botën. Vepra e tij e parë është ‘Procesverbali’, shkruar kur
ishte 23 vjeç. Ndër veprat më të njohura, kujtojmë: “Kontineti i padukshëm’, “Diego
e Frida”, “Afrikani” etj. Në motivacionin e Akademisë, vlerësohet si “shkrimtar
i rrugëve të reja, i aventurës poetike dhe i ekstazës shqisore”. Temat më të pëlqyera
nga shkrimtari, në pjekurinë e tij artistike, janë ajo e fëmijërisë, e pakicave etnike,
e shtegtimeve. Përveç lavdisë, njëherësh me Çmimin, Le Clézio do të marrë
edhe dhjetë milionë korona suedeze (rreth një milion euro) e natyrisht, një mori opinionesh
në mbrojtje e kundër “aventurës së tij” të gjatë letrare, të cilat tashmë kanë filluar
të duken në faqet e shtypit e të internetit.