Indi: maoistët pranojnë vrasjen e Svamit, shkëndijë e sulmit kundër të krishterëve.
(08.10.2008 RV)Svami është vrarë nga maoistët hinduistë, ndërsa qeveria e Orisës
i ka fshehur provat. Akuzat e rënda arrijnë në AziaNjuz, nga lideri maoist, Sabiasaki
Panda, i cili ripohon autorësinë e vrasjes së Svami Laksamananda Sarasvatit, pas së
cilës filloi sulmi tragjik kundër të krishterëve të Orisës. Ai pohon se autorët e
vrasjes lanë dy letra në vendin e krimit, por qeveria heshti, për t’i fajësuar të
krishterët e për t’u lënë rrugë të lirë fanatikëve hinduistë që të nisnin sulmin kundër
tyre, ‘me qëllime thjeshtë elektorale’. Svami, një nga krerët e grupit radikal Vishna
Hindu Parishad, u vra më 23 gushtin e kaluar nga një grup i armatosur. Menjëherë pas
kësaj ngjarjeje, hindustët fanatikë nisën sulmet kundër të krishterëve, ndonëse dyshonin
se autorë të vrasjes ishin maoistët. “E dënuam me vdekje edhe e vramë – pohon Panda
- sepse i detyronte indianët tribalë e të krishterë dalit, të ndërronin fenë e të
bëheshin hinduistë, duke i kërcënuar e duke u premtuar ndihmë ekonomike”. Fushatat
antikristiane, që mbështeten nga pronarët e tokave dhe tregtarët, të cilët nuk e duan
emnancipimin e dalitëve e të tribalëve, kanë shkaktuar deri tani vdekjen e 61 personave,
djegien e 4 mijë shtëpive që banoheshin nga të krishterët, shkatërrimin e 181 kishave
e kapelave si dhe të 13 shkollave e qëndrave shoqërore. Në shumë fshatra, sidomos
në Kandamal, vijonë sulmet e rrufeshme. Sipas liderit maoist, kryeministri i Orisës,
Neven Patnaik, duhet të japë menjëherë dorëheqjen, sepse nuk i ka mbrojtur të krishterët
dhe pronat e tyre. Edhe organizatat e krishtera akuzojnë qeverinë e Orisës e atë qëndrore.
Por ato kërkojnë t’i jepet fund veprimtarisë së grupeve radikale hinduiste, të akuzuara
si organizata të mirëfillta terroriste.