Papa në përshëndetjen bashkësive të Kastel Gandolfos “Të kërkojmë me besim ndihmën
dhe mbrojtjen e Engjëjve".
(29.08.2008 RV)Sot paradite Papa
u takua me bashkësitë fetare e civile të Kastel Gandolfos, për përshëndetjen tradicionale
të lamtumirës, në përfundim të periudhës së kaluar në selinë e tij verore, në qytezën
laciale. Nesër, kthimi në Vatikan. Me që takimi u mbajt në festën e Shenjtorëve Kryeengjëj,
Mikelit, Gabrielit e Rafaelit, Papa shfrytëzoi rastin t’i ftojë besimtarët për të
kërkuar me besim ndihmën e engjëjve. Ati i Shenjtë falënderoi me gjithë zemër bashkësitë
fetare e civile si dhe mbarë popullsinë e Kastel Gandolfos, për pritjen që i bënë
gjatë muajve të verës. Benedikti XVI shkoi në qytezën laciale më 2 korrikun e kaluar,
siç e kujtoi edhe vetë dje në lutjen e Engjëllit të Tënzot – që të kishte mundësi
për të pushuar e për të punuar më mirë në muajt më të nxehtë. Falënderoi edhe Forcat
e Sigurimit dhe trupat e Avioregjimentit të 31-të të Flotës Ajrore Ushtarake për udhëtimet
e tij me helikopter e me avion. Duke marrë shtytjen nga festa e sotme e Shenjtorëve
Kryeengjëj, Mikelit, Rafaelit e Gabrielit, kujtoi se secili prej tyre ka një mision
të posaçëm në historinë e shëlbimit: “Të dashur vëllezër e motra,
ta kërkojmë me besim ndihmën e tyre, si dhe mbrojtjen e Engjëjve të Rojës, festën
e të cilëve do ta kremtojmë më 2 tetor. Prania e padukshme e këtyre shpirtrave të
lum, na ndihmon e na ngushëllon fort: ata ecin përkrah nesh e na mbrojnë në çdo rrethanë,
na ruajnë nga rreziqet e mund t’u kërkojmë ndihmë në çdo çast”.
Shumë
shenjtorë – vijoi Papa - kishin me Engjëjt marrëdhënie të vërteta miqësie e të shumta
janë episodet, që flasin për ndihmën e tyre në raste të veçanta: “Engjëjt dërgohen
nga Zoti për t’i shërbyer atyre, që do ta trashëgojnë shëlbimin, siç na e kujton Letra
drejtuar Hebrenjve (1,14), e na japin ndihmën e tyre në shtegtimin
tokësor drejt Atdheut qiellor”.