Urgjencat e ekonomisë globale: reflektim i Atë Lombardit.
(28.09.2008 RV)Çdo fundjave, drejtori
ynë i përgjithshëm, Atë Federiko Lombardi, ia kushton editorialin ngjarjeve kryesore
të ditëve të fundit, në Kishë e në shoqëri. Sot vëmendja e tij shkon pikërisht atje,
ku është përqendruar vëmendja e mbarë njerëzimit: tek urgjencat e ekonomisë globale,
që kanë të bëjnë me të gjithë, e tek masat që mund e duhen marrë për zhvillimin e
vendeve të varfëra, si dhe për paqen e mirëqenien e mbarë njerëzimit:
“Masat
ekonomike që u morën në kohën e duhur për shpëtimin e sistemit financiar amerikan,
me jehonë ndërkombëtare, janë tronditëse përsa u përket përmasave të tyre. Duke marrë
pjesë pranë Kombeve të Bashkuara në diskutimin mbi zbatimin e Deklaratës së Mijëvjeçarit
kundër varfërisë, urisë, padijes e sëmundjeve, Përfaqësuesi i Vatikanit, imzot Miliore,
vërejti se përpjekja për t’i shpëtuar ekonomitë më të zhvilluara nga kriza, ia kalon
shumë herë ndihmës ndërkombëtare botërore. Pa e vënë në dyshim urgjencën për kapërcimin
e kësaj krize, prej këndej lind një pyetje e natyrshme: Po atëhere, a nuk mund e nuk
duhet bërë më shumë edhe për të shpëtuar ekonomitë e për të nxitur zhvillimin në vendet
më të varfëra? Pa harruar se burimet e nevojshme për të ndihmuar të varfërit janë
tepër të vogla, në krahasim me shpenzimet ushtarake botërore e me shpenzimet e popullsive
të pasura për plotësimin e nevojave të dorës së dytë. Këto reflektime mund
të duken si të njohura, madje edhe si foshnjore, por në të vërtetë janë themelore
për një vizion largpamës të të njëjtave interesa të përgjithshme të njerëzimit, që
duhet të kujdeset për zhvillimin paqësor e të drejtpeshuar në favor të të gjithëve.
Papa e përfundoi thirrjen e tij kushtuar kësaj teme në lutjen e Engjëllit të Tënzot
të së dielës, 21 shtator, me fjalët: “Një impenjim i tillë, ndonëse në këto çaste
vështirësish ekonomike botërore kërkon flijime të veçanta, nuk do të vonojë të japë
frytet e veta si për zhvillimin e Kombeve, që kanë nevojë për ndihmë nga jashtë, ashtu
edhe për paqen e mirëqenien e mbarë Planetit”.