Imzot Miliore në OKB: mosrealizimi i objektivave të Mijëvjeçarit do të ishte falimentim
për të gjithë.
(26.09.2008 RV)Globalizmi i solidaritetit përmes realizimit të shpejtë të objektivave
të Mijëvjeçarit është detyrim moral i bashkësisë ndërkombëtare. Këtë theksoi kryeipeshkvi
Çelestino Miliore, vëzhgues i përhershëm i Selisë së Shenjtë pranë OKB-së, në fajlimin
e mbajtur dje në Asamblenë e 63-të Përgjithshme të OKB-së. relati vuri theksin
edhe mbi progresin në vendet më pak të përparuara, që shpresonin shumë në mbështetjen
nga bashkësia ndërkombëtare, e cila fatkeqësisht është vonuar shumë në përpjekjet
për realizmin e zotimeve të marra lidhur me luftën kundër varfërisë, pabarazisë, urisë,
dëmit ambiental, Sidës. Vëzhguesi i Selisë së Shenjtë i ftoi vendet më të përparuara
ta pranojnë plotësisht përgjegjësinë e tyre, duke pasur mirë parasysh se vendet e
varfëra po e humbasin shpresën në ndihmën e të pasurave e se realizimi i objektivave
lidhet ngushtë me respektimin e të drejtave të njeriut. Një falimetim në këtë drejtim,
do të ishte dështim i rëndë moral. Prandaj është e nevojshme të krijohet një kulturë
e re e marrëdhënieve njerëzore, e karakterizuar nga vizioni vëllazëror i botës; një
kulturë e bazuar mbi imperativin moral të njohjes së unitetit të gjinisë njerëzore
e mbi imperativin praktik të dhënies së kontributit për paqen. Burimet e nevojshme
janë tepër të pakta, në krahasim me shumën e përgjithshme të shpenzimeve ushtarake
ose të atyre për sigurimin e të mirave, që nuk janë të domosdoshme, në vendet më të
zhvilluara. Imzot Miliore kujtoi edhe veprimtarinë e shoqërisë civile e, sidomos të
organizmave fetare, ‘aktorë të domosdoshëm’ për të ndihmuar vendet nevojtare e provë
konkrete e mundësisë për realizmin e objektivave të Mijëvjeçarit. Prelati nënvzioi,
në përfundim, edhe impenjimin e Selisë së Shenjtë e të organizatave të saj në përpjekjen
për të dhënë ndihmë e mbështeje, kudo ndjehet nevoja. Së fundi, përfaqësuesi i Vatikanit
e ftoi bashkësinë ndërkombëtare të përqendrohet më shumë në objektivat që duhen realizuar,
pa u hutuar nga objektiva të reja, siç është ‘shëndeti seksual e riprodhues’, që krijojnë
rrezikun e përhapjes së praktikave e të politikave, të cilat cënojnë dinjitetin njerëzor
dhe zhvillimin e qëndrueshëm. Në përfundim ripohoi me forcë detyrimin moral të globalizimit
të solidaritetit, përmes arritjes së objektivave të Mijëvjeçarit, rrugë e nevojshme
për të arritur stabilitetin e ekonomisë globale e për të siguruar respektimin e të
drejtave të të gjithëve.