(25.9.2008. RV)Konferencë në Tiranë kushtue At Zef Pllumit: “mes shkrimit
dhe historisë” Me kalimin e kohës njerëzit dhe veprimtaria e tyne shihen ma
mirë e ma qartë, sidomos kur publiku i gjanë i mban si të mëdhaj, pse tue u largue
në kohë nji figurë e këtillë vrojtohet ma mirë. Me datën 25 shtator mbushet plot nji
vit qysh se At Zef Pllumi, dëshmitari i plojës së komunizmit enverian, u nda prej
nesh. Edhe pse nji vit asht pak për me fol për të në kandvështrimin objektiv të historisë,
mbasi protagonistat e asaj historie janë ende gjallë, prap se prapë mund të themi
diçka për ripërpunimin që kujtesa kolektive i ban nji personazhi si At Zef Pllumi.
Tashma asht ngulít gjanësisht në vetëdijen e shqiptarëve ideja se të gjithë kishim
nevojë për nji rrëfim paqsor dhe të vërtetë të kohës së komunizmit, si ai që na la
At Zef Pllumi tek kryevepra e tij «Rrno vetëm për me tregue». Janë shkrue shumë vepra
për at’ periudhë, prej shkrimtarësh të ndryshëm, por ajo e fratit françeskan qëndron
si për nga pikëpamja artistike ashtu edhe nga ajo historike në nji plan ma naltë se
tjerat. Rrëfimi i tij zhdrivillon rranjët e nji tragjedie kombtare që nisi në vitin
1944, nji luftë që për ne niste atëherë kur e gjithë Europa fitonte paqen e shumëandrrueme.
Kjo luftë e zuni dhe e mori para edhe fratin e ri 20 vjeçar, që humbi familjen e tij
françeskane dhe familjen e tij atnore, humbi të afërm, miq, shokë, të njohun, bashkudhtarë,
por nuk humbi vetveten dhe ideale me të cilat ishte mbrujtë. Dy gjana e mbajtën gjallë
pa e humbë për asnji çast shpresën: vetëdija e krishtenë që e keqja nuk ka me triumfue
kurrë përfundimisht mbi të mirën dhe ndjenja malsore e nderit dhe e burrnisë. Gjatë
viteve të burgimit të gjatë ai njohti shqiptarin dhe zemrën e tij, e pa prej afër
se njerëzit e mirë kishin forcë me mbetë të tillë edhe në rrethanat ma të vështira,
por pa edhe cinizmin, meskinitetin dhe zemërligësinë. At Zef Pllumi përjetoi historinë
me qëllimin me mbijetue për me rrëfye udhtimin e tij përmes ferrit deri në purgator.
Ky asht rrugtimi i tij në trilogjinë «Rrno vetëm për me tregue». Mbas nji viti prej
ndamjes së tij prej nesh Provinca Françeskane shqiptare, revista «Hylli i Dritës»,
Instituti i Studimeve Politike «Alcide de Gasperi», Qendra e Studimeve Albanologjike
dhe Universiteti i Tiranës kanë organizue nji tubim shkencor me temën: «At Zef Pllumi:
mes shkrimit dhe historisë». Ky tubim synon nxjerrjen në pah të aktivitetit dhe të
veprës së françeskanit shqiptar, e për ketë qëllim janë ftue të marrin pjesë studjues
shqiptar dhe të huej. Konferenca do të nisin punimet në orën 9 paradite të datës 25
shtator në mjediset e Muzeumit Kombtar. Mbi të gjitha asht me randësi kuptimi i nevojës
që kemi për nji rrëfim historik të vërtetë. Sot brezi ma i ri e ndien të fortë mungesën
e nji historie objektive, pse deri tashti historianët me metoda enveriste na kanë
servir nji histori të paplotë, e edhe atëherë kur nuk kanë mujtë me i mshehë ma faktet
reale i kanë paraqitë ato të zbehta dhe pa lidhjen strukturale shpirtnore që shpjegon
faktet mbrenda kornizës historike. Metodat e vjetra të shkrimit të historisë, teoremat
e gatshme, ndamja me bisturi e të mirëve prej të këqijve, mania e dhanjes së gjykimeve
morale për çështje dhe fakte që qëndrojnë mbi individët dhe grupet e ndryshme, na
ka përcjellë vepra historike ku e vërteta dhe rrena janë ndërthurë në mënyrë deliberative
dhe me vetëdije të plotë. Mirëpo sot brezi i ri, që asht rritë në këto dekadat e fundi,
larg tymit të ideologjisë komuniste, as që përfill ma disa mentorë të rremë që këtej
e andej kufijve të Shqipnisë jetojnë falë polemikave shterpe dhe ideve të tyne të
shtrembta. Vetë ata përfaqsojnë tashma nji botë mediokre dhe nji mendësi të perëndueme,
e nuk mundet ma me rrejtë askënd me demagogjinë e tyne kallpe dhe bajate. Leximi dhe
studimi i veprës së At Zef Pllumit na ndihmon me shikue historinë me sytë e mendjes
sonë dhe me arsyetue lirisht rreth saj, tue kuptue kështu edhe mashtrimin e madh të
pseudo-historianëve që nisnin e mbaronin historinat e tyne me selameleqe drejtue “udhëheqësit
të ndritun” e lakejve të tij besnikë. E randësishme asht se sot historinat e tyne
kanë përfundue në lagshtinën e bodrumeve të bibliotekave, ndërsa librat e At Zef Pllumit
po gjejnë gjithnji e ma shumë lexuesa ndër të rinj e të reja që duen me kuptue se
çka ishte murtaja ma e madhe që ra në Shqipni gjatë shekullit XX, komunizmi enverian.
... 25-09-2008 / nga Ardian Ndreca