Papa do të shkojë në San Xhovani Rotondo në vitin 2009. Lajmin e dha kard. Bertone
(23.09.2008 RV)Papa Benedikti XVI do të shkojë në San Xhovani Rotondo në vitin
2009, për t’i bërë homazhe Shën Pios nga Pietrelçina. Lajmin e dha sekretari i Shtetit
të Vatikanit, kardinali Tarçizio Bertone, i cili kryesoi sot paradite kremtimin eukaristik
pikërisht në qytezën jugore të Italisë, në ditën e festës liturgjike të shenjtit e
të 40-vjetorit të vdekjes së tij: “Benedikti XVI më tha që t’ju lajmëroj se
çdo gjë është gati. Ati i Shenjtë do të vijë me gjithë qejf në San Xhovani Rotondo
në vitin 2009”. Duke përshkruar figurën e Shën Pios, kardinali Bertone nënvizoi
dy aspekte themelore të fratit nga Pietralçina: besnikërinë ndaj Ungjillit dhe orientimin
e vazhdueshëm drejt mbretërisë së qiellit. Atë Pio, që vazhdon të jetojë në misterin
e Jezusit të vdekur e të ngjallur, “ishte dishepull i Krishtit që nuk deshi tjetër
veçse të donte e të vuante për Të”. “Ishte meshtar – pohoi prelati – që nuk kërkoi
gjë tjetër veçse të shkrihej në dashurinë për Zotin e për vëllezërit”: “Ishte
bir i sinqertë i Kishës, i cili edhe në rastet më të dhimbshme preferoi të mos mbrohej,
duke e mohuar vetveten, i varrosur nën heshtjen e butë të bindjes torturuese, por
të frytshme”. Një përvjetor tjetër, që bie pikërisht këtë vit – kujtoi kardinali
Bertone – është 90-vjetori i dukjes së plagëve të para të Krishtit në trupin e shenjtit.
Atë Pio “riprodhonte dukshëm figurën e të Kryqëzuarit” dhe fizikisht, sa herë që jepte
sakramentin e faljes, dëshmonte për çmimin e gjakut, që i është dashur të paguajë
Krishtit. Plagët e Krishtit u kujtonin të gjithë atyre, që kërkonin ndërhyrje e mrekulli
se sa kushtonin ato “hire”, që Zoti shpërndante me bujari. Thelbi i jetës së
Atë Pios përmblidhet në Meshën e Shenjtë, në kremtimin e përditshëm të Eukaristisë.
Frati i Pietrelçinës i këshillonte të gjithë t’i afroheshin Jezusit, në një takim
pa rezerva, siç mund të kuptohet edhe nga ky regjistrim i zërit të shenjtit: “Të
duam pa asnjë rezervë, pavarësisht nga shpërblimi, që Zoti ka në mend për ne – ajo
është rrjedhojë – duke e bërë tonin moton e Shën Palit Apostull kur thotë: nuk dua
të di gjë tjetër, veçse për Jezusin e për Jezusin e kryqëzuar”.