Kardinali Tarçizio Bertone kroatëve: “Mos lejoni t’ju mashtrojnë e keqja dhe idhujt
e rremë të modernitetit.
(22.09.2008 RV)Mos e lini veten
t’ju mashtrojnë joshjet e së keqes: është ftesa e kardinalit Tarçizio Bertone, sekretar
i Shtetit të Vatikanit, drejtuar parmbrëmë të rinjve kroatë në katedralen e Zagrebit.
Ndërsa dje, Hirësia e Tij- në tokën kroate që të enjten e kaluar për të kremtuar 1700-vjetorin
e themelimit të Splitit e për të kujtuar shtegtimin apostolik të Gjon Palit II, dhjetë
vjet më parë - kryesoi Meshën solemne në sheshin para vetë Katedrales, duke i bekur
besimtarët kroatë, në emër të Papës e duke i nxitur ta dëshmojnë me guxim fenë e tyre
në Krishtin. Pasi u përcolli përshëndetjet e përzemërta të Benediktit XVI, kardinali
Bertone u ndal posaçërisht tek figura e ndritur e kardinalit Stepinac, lumnuar nga
Gjon Pali II, njeri që nuk e ndau kurrë jetën nga feja. Më pas i ftoi besimtarët të
ecin në gjurmët e të Lumit, në udhën e besnikërisë e të shenjtërisë, të mirësisë e
të bashkimit. Përballë ideologjive të rreme fashiste e komuniste, që në shekullin
e kaluar shkaktuan aq shumë vuajtje, por edhe të vështirësive jo të vogla, që duhet
të përballojnë besimtarët në kushtet e sotme shoqëroro-politiko-kulturore – pohoi
kardinali Bertone - duhen edukuar me frymën e heroizmit e të shenjtërisë posaçërisht
breznitë e reja. Është, prandaj, i domosdoshëm ungjillëzimi i ri, me mënyra e forma
të reja katekizmi e veprimtarie misionare. Më pas Hirësia e Tij i porositi besimtarët
të ruhen nga idhujt e rinj të modernitetit, që sundojnë në shoqëritë kapitaliste perëndimore,
posaçërisht nga miti i përfitimit e nga etja për para. Sekretari i Shtetit të Vatikanit
shprehu besimin se kroatët do të jenë interpretues të urtë e të vetëdijshëm të traditës
së tyre të krishterë, që e bëri popullin kroat, popull katolik e se do të dinë t’i
përballojnë me guxim e urti sfidat e lindura nga takimi me progresin modern, me kulturën
e sotme të liberalizmit e të relativizmit. “Ruajeni të paprekur thesarin e fesë dhe
vlerat morale, trashëguar nga paraardhësit tuaj e përcilljani breznive të reja, që
do të vijnë pas jush” - kjo është ftesa e kardinalit Bertone i cili, në përfundim
të kremtimit, i bëri thirrje mbarë Kishës kroate të ndjekë me guxim shembullin e
kardinalit Stepinac, duke përballuar, si ai, vështirësitë, vuajtjet e pengesat, për
ta mbajtur fjalën, dhënë Krishtit e Kishës së Tij. Lidhur me vizitën e kardinalit
Bertone, që u largua dje nga Kroacia, ipeshkvijtë e vendit publikuan një notë, përmes
së cilës nënvizojnë vlerësimin e Hirësisë së Tij për impenjimin baritor dhe projektet
e përtëritjes, që po realizohen në favor të ungjillëzimit të ri, të jetës sakramentore
e të jetës shoqërore të popullit kroat.