Papa ipeshkvijve panamezë: të dëshmohet shpresa e krishterë, për të mundur varfërinë,
dhunën e shekullarizimin.
(19.09.2008 RV)“Duhet një dëshmi e
vërtetë e krishterë, për të përballuar me sukses sfidat e varfërisë, të dhunës e të
shekullarizimit”: këtë pohoi Benedikti XVI duke pritur sot në Kastel Gandolfo ipeshkvijtë
e Panamasë, në vizitë ad Limina Apostolorum. Pasi kujtoi fenomene si varfëria,
dhuna ndërmjet të rinjve, sektet e panumërta dhe korrupsioni, që trondisin jetën në
vend, Papa nënvizoi sa e rëndësishme është shpresa e krishterë e cila, në këtë situatë,
mund ta ndriçojë popullin e Panamasë: “En su País, como en otros lugares,
se están viviendo momentos arduos…” Vendi jeton çaste të vështira, prandaj
është posaçërisht urgjente që Kisha ta ndriçojë popullin, duke kontribuar për zgjidhjen
e problemeve, që peshojnë rëndë mbi jetën e njerëzve e duke promovuar në shoqëri,
miratimin moral të vlerave themelore. Është fjala për të dëshmuar lumturinë, që buron
nga ndjekja e Krishtit e për të ndarë bashkë me të tjerët, gëzimin që lind në shpirt,
kur e ndjen se Ai na do deri në fund të fundit. E kjo, në gjirin e një shoqërie, e
cila përdor të gjitha mjetet për të imponuar vizionin e botës e të njerëzimit pa Zot;
vizion që depërton çdo çast në jetën e përditshme; që përhap, përmes mjeteve të komunikimit
shoqëror, individualizmin, hedonizmin, ideologjitë e doket, minuese për themelet e
martesës, të familjes e të moralit të krishterë. Përballë një situate të tillë, duke
i nxitur ipeshkvijtë ta thellojnë veprimtarinë e frytshme misionare, që vijon në vendin
latino-amerikan, e duke kujtuar vizitën e Gjon Palit II në Panama, 25 vjet më parë,
Benedikti XVI tregon rrugët që duhen ndjekur: lutja për thirrje meshtarake e rregulltare,
por edhe përzgjedhja e kujdesshme e kandidatëve: “…el Seminario,
en el que ha de privilegiarse una seria disciplina académica…” Benedikti
XVI kërkon disiplinë serioze në Seminar, ku duhet krijuar hapësira e duhur për lutjen
e përditshme, kremtimin e denjë të liturgjisë, drejtimin e përshtatshëm shpirtëror
e vëmendjen e veçantë për kultivimin e virtyteve njerëzore e meshtarake. Pastaj, për
vetë problematikën e vendit, ndjehet fuqimisht nevoja për punë të thelluar baritore
me familjet. Mjeti që tregon Papa, është Doktrina Shoqërore e Kishës. Ati i Shenjtë
kujtoi edhe shembullin e shkëlqyer të misionarëve, të cilët lanë gjurmë të pashlyeshme
në Panama dhe i inkurajoi prelatët t’i thellojnë veprimtaritë baritore për përgatitjen
e kremtimeve me rastin e pesëqind vjetorit të ungjillëzimit të vendit, që do të kremtohet
gjatë vitit 2013.