(15.09.2008 RV)I mbyllur në një kafaz bambuje, në perandorinë e largët të Anamit
(emri i lashtë i Vietnamit) një djalosh i burgosur lutet. Quhet Teofan Venard, është
francez e sapo i ka mbushur 31 vjetët. Nuk i ka parë familjarët prej tetë vjetësh,
por nuk trishtohet aspak: e zgjodhi vetë rrugën e misionit, larg Francës, larg familjes,
miqve e dashamirëve. Kanë kaluar nëntë vjet, që kur vendosi të bëhej misionar. “Kur
të rritem, do të nisem drejt tokave të largëta, për t’ua kumtuar fenë time popujve,
që nuk e njohin”, mendonte që i vogël. Për ta realizuar këtë dëshirë kaq fisnike,
nis studimet në seminar, ku përgatitet për misionin meshtarak. Pastaj, më 1852, u
tregon prindërve, vëllezërve e motrave se ka vendosur të niset për në Azi e se duhet
të jenë të kënaqur për të, sepse e ndjen veten vërtetë të lumtur. Niset të ndihmojë
misionarët, prej kohe të pranishëm në këto troje, për të formuar meshtarë të rinj. Si
arrin në vend, e fillon misionin me pasion të jashtëzakonshëm, duke vënë në shërbim
të tij, të gjitha energjitë. Por punët nuk janë aspak ashtu, si i përfytyronte. Perandori
nuk i pranon më misionarët, të cilët nisin të perskutohen gjithnjë më shumë. Për
shkak të këtyre persekutimeve, Teofani detyrohet shpesh herë të ikë e të fshihet.
Përveç kësaj, sëmuret edhe nga tuberkulozi. Brenda dy vjetësh sëmundja e rëndë ia
shkrin krejt trupin, veç jo entuziazmin. Një ditë njëri nga të tijtë e tradhton. E
kapin. Por ai është aq i sjellshëm e buzagaz, sa rojet nuk e keqtrajtojnë. Madje mundohen
t’ia lehtësojnë sadopak jetën në burg, ndër pranga. Teofani u flet rojeve për fenë
e tij e këta e kuptojnë, por feja katolike është e ndaluar. Në se dëshiron të shpëtojë
jetën, duhet ta mohojë! Nxiret para gjyqit, po ai nuk pranon ta mohojë Zotin e vet:
është gati të vdesë, para se ta tradhtojë. Atëherë dënohet me vdekje! I mbyllur
në kafaz, pret me durim çastin e fundit. Dikush, fshehurazi, i jep diçka për të ngrënë
e disa hoste. Një meshtar vishet si mandarin, për t’i dhënë sakramentet e fundit.
Teofanin e duan shumë njerëz. E duan, por s’mund ta shpëtojnë. Më 2 shkurt 1861, një
grup ushtarësh e shoqëron gjatë brigjeve të Lumit të Kuq, deri te vendi i ekzekutimit.
Ai vijon të lutet, duke përgatitur, kështu, për të hyrë në mbretërinë e Zotit. Do
të shpallet shenjt një shekull më pas, së bashku me njëqind e gjashtëmbëdhjetë martirët
e Vietnamit.