Papa në Lurdë: Mesha për 150 vjetorin e dukjeve të Zojës Bekuar Bernardetës
(14.09.2008 RV)Mesazhi i Zojës
së Lurdës është ftesa për pendesë e për shëlbim: Benedikti XVI e përsëriti, duke kremtuar
para dyqind mijë besimtarëve, në Prairie, Meshën me rastin e 150-vjetorit të dukjeve
të Zojës Bernardetës, ditën kur Kisha kremton festën e Naltimit të Kryqit. Nga
Lurda – e dërguara e Radios sonë, Françeska Sabatineli:
Misteri i Kryqit,
flijimi i Krishtit për shëlbimin e botës, është mesazhi që Zoja e Bekuar ua besoi
njerëzve; e ky mesazh vjen përsëri nga Shpella e Lurdës, duke i ftuar të gjithë të
pendohen, të kthehen e të shpresojnë. Benedikti XVI, nga Lurda, u foli mijëra besimtarëve,
që përshkuan gjithë Francën e erdhën nga vende të ndryshme, për ta dëgjuar me rastin
e 150-vjetorit të dukjeve të Zojës. Nga Lurda Papa u kujtoi atë që Maria vijon t’u
dëftojë njerëzve: shenja e Kryqit, sintezë feje, na siguron se pushteti i dashurisë
është më i fortë se çdo e keqe, që mund të na kërcënojë:
“Elle invite
tous les hommes de bonne volonté, tous ceux qui souffrent… Ajo i
fton të gjithë njerëzit vullnetmirë dhe të gjithë ata që vuajnë në shpirt e në trup,
t’i sjellin sytë drejt Kryqi, për të gjetur aty burimin e jetës e të shëlbimit”. Kremtimi
i Jubileut të dukjeve, mesazhi i Lurdës, mund t’i japë një hov të ri fesë e mund ta
fuqizojë më tej Kishën, për ta kumtuar me guxim gjithnjë më të madh misterin e Krishtit.
Maria zgjodhi Bernardetën për të transmetuar mesazhin e saj të kthimit, të lutjes,
të pendesës. Maria na zbulon, në Lurdë, bukurinë e shndërruar, figurën e njerëzimit
të ri:
“Marie exprime en réalité une attitude de peline liberté... Maria
shpreh sjelljen e lirisë së plotë, bazuar mbi njohjen e plotë të dinjitetit të vet.
Ky privilegj u përket të gjithëve, sepse zbulon dinjitetin e njerëzve të dënuar nga
mëkati, por të shpëtuar në shpresë, gjë që i ndihmon ta përballojnë jetën e përditshme”.
Maria në Lurdë na kujton rolin qëndror
që ka lutja në jetën e të krishterëve. E Papa iu drejtua të rinjve, të mbledhur rreth
Kryqit të DBR-së, që e duartrokisnin, e thërrisnin me emër, e u kërkoi të mos e humbasin
guximin përballë vështirësive. Duke i nxitur të marrin shembull nga Maria përballë
Kumtimit të Engjëllit, i ftoi, ashtu si dje, gjatë Meshës së kremtuar në Paris, t’u
përgjigjen thirrjeve të Zotit, sepse ai mund t’ ua plotësojë dëshirat më të thella
të zemrave të tyre: “À ceux, parmi vous, que le Seignerur appelle
à sa suite... Atyre që Ai i thërret ta ndjekin në rrugën meshtarake
ose rregulltare, Papa u kujton gjithë lumturinë, që ndjen njeriu, kur e dhuron plotësisht
jetën e vet në shërbim të Hyjit e të njerëzve”. Urimi
i Atit të Shenjtë është që familjet dhe bashkësitë e krishtera të bëhen vende, ku
mund të lindin e të fitojnë pjekurinë thirrje të reja në shërbim të Kishës e të botës.
Maria – përfundoi Papa - ju fton të jetoni si ajo, plot me shpresë të pamposhtur e
duke mos ua vënë veshin atyre, që pretendojnë se ne jemi të burgosurit e fatit.
E
para Marisë – tha më pas Benedikti XVI gjatë lutjes së Engjëllit të Tënzot
– njeriu nuk ngurron të shfaqet me të gjithë ligështinë e tij, të bëjë pyetje, të
shkarkojë dyshimet e dëshirat më të fshehta. Dashuria për Marinë çarmatos çdo formë
të mburrjes e, falë Asaj, zbulojmë se feja e krishterë nuk është barrë e rëndë.
Benedikti XVI e përfundoi lutjen e Engjëllit të Tënzot duke përshëndetur turmën shumëkombëshe,
që mori pjesë në Meshë, e duke u uruar të gjithëve ta presin me gëzim mesazhin që
Zoja e Papërlyer ia besoi Shën Bernardetës:
“Preghiera e conversione…. Lutja
e kthimi i zemrave janë rruga për ta rinuar botën”.