Koment i Atë Lombardit për fjalimin e Papës drejtuar botës së kulturës franceze
Të kthehemi te takimi
i Papës Benedikti XVI me botën e kulturës në Francë. Ka bërë jehonë të madhe,
fjala që Ati i Shenjtë i drejtoi botës së kulturës në Kolezh dë Bernardë. “Një fjalim
shumë i gjerë, jo me efekte, që kërkon dëgjues të vëmendshëm e të dëshiruar të përshkojnë
një itinerar intelektual, të udhëhequr nga analiza e Papës”. Kështu komenton drejtori
ynë i përgjithshëm, Atë Federiko Lombardi, në udhëtim me Benediktin XVI, si zëdhënës
i Selisë së Shenjtë: Papa reflekton mbi vendin themelor që kërkimi i Zotit ka pasur
në formimin e kulturës evropiane dhe mbi vendin që ai kërkim i Zotit vazhdon të ketë
në çdo kulturë të vërtetë. Ky është një diskutim që Papa e zhvillon, duke reflektuar
sidomos mbi kulturën murgare. Ai vë në dukje se kultura murgare frymëzohet nga kërkimi
i Zotit e ky kërkim çon në dashurinë për letërsinë, çon në dashurinë edhe për shkencat
profane, çon në zhvillimin e muzikës për të medituar e lavdëruar Zotin, në përfshirjen
në harmoninë e Krijimit, çon në zhvillimin e interpretimit të përgjithshëm të Shkrimit
Shenjt. Pastaj, komponentja tjetër e madhe e kulturës murgare është puna: ora et labora.
Një kulturë pune, që hyn në planin e madh të veprës së Zotit Krijues, që është një
punë me përgjegjësi ndaj Krijimit. Ja, këto tematika të mëdha na bëjnë të kuptojmë
se si motivacioni themelor fetar mbi bazën e të cilit lind kultura e madhe evropiane
– sepse kultura murgare është elementi bazë, ndërlidhës i kulturës së kontinentit
evropian – është thelbësor për identitetin e Evropës. Është pra, e rrezikshme, madje
është për t’u shmangur absolutisht, mënjanimi i përmasës fetare dhe të pyetjeve mbi
Zotin nga kultura jonë bashkëkohore. Për botën e sotme, Zoti mbetet në shumë aspekte,
krejt i panjohur, por është Ai që të krishterët e shpallin si Ai që është arësyeja
universale, Ai që i jep kuptim Krijimit dhe Historisë e për rrjedhojë, bën të mundur
zhvillimin e një humanizmi të vërtetë. Nëse heqim dorë nga pyetjet mbi Zotin vemë
në rrezik të ardhmen e njerëzimit. Këto tema Papa i ka prekur e shpjeguar në shumë
raste. Më duket se kontributi i ri i këtij fjalimi të madh është pikërisht analiza,
paraqitja e arësyetuar e rolit të kërkimit të Zotit në formimin e kulturës, që bashkoi
Kontinentin tonë në shekujt e Mesjetës, gjatë të cilave u formua vërtet identiteti
i Evropës.