Papa ka filluar viziten në Francë me rastin e 150-vjetorit të dukjeve të Zojës në
Lurdë
(12.09.2008 RV)Papa Benedikti XVI mbërriti në Francë për vizitën e tij të parë
në këtë vend si Pasardhës i Shën Pjetrit. Udhëtimi i tij apostolik bëhet në 150-vjetorin
e dukjeve të Zojës në Lurdë, pra një shtegtim i rëndësishëm marian, etapa e parë e
të cilit është kryeqytetit i Francës, Parisi. Pikërisht këtu, Papa arriti rreth orës
11.00, ku u prit në aeroportin e Orlit nga presidenti i Republikës, Nikola Sarkozì
shoqëruar nga bashkëshortja, si edhe nga kryeipeshkvi i Parisit, kardinali Andrè Vënt-Trua. Përveç
festimit të përvjetorit të Zojës së Lurdës, ky udhëtim do të jetë edhe rasti për t’iu
përgjigjur fjalimit mbi laicitetin pozitiv dhe mbi rrënjët e krishtera të Francës,
mbajtur nga presidenti francez në dhjetorin e kaluar në kishën e Shën Gjonit në Lateran
në Romë. Prej andej, filloi një diskutim i hapur në shoqërinë franceze, mbi ligjin
për laicitetin të vitit 1905. Sipas opinionit të përgjithshëm, mund të hapet një fazë
e re në marrëdhëniet ndërmjet Shtetit dhe kishës.