Papa përshëndet Francën në prag të shtegtimit të tij për 150-vjetorin e dukjeve të
Lurdës: ‘Vij si lajmëtar i paqes dhe i vëllazërisë”.
(10.09.2008 RV)Sot, në përfundim të audiencës së përgjithshme në Sallën e Palit
VI në Vatikan, Papa i drejtoi një përshëndetje të posaçme kombit francez, duke i ftuar
të gjithë besimtarët të luten për shtegimin e tij baritor në Francë, që do të fillojë
të premten e ardhshme, për të vijuar deri më 15 shtator, me rastin e 150-vjetorit
të dukjeve të Zojës së Bekuar në Lurdë:
“Chers Frères et Sœurs…” Papa
i drejton kombit të shumëdashur francez, në prag të vizitës së tij të parë baritore
në Francë, si Pasardhës i Shën Pjetrit, përshëndetjen e tij më të përzemërt për popullin
francez e për mbarë banorët e këtij Vendi:
“Je viens chez vous en messager
de paix et de fraternità… Vij mes jush si lajmëtar i paqes dhe i
vëllazërisë. E njoh vendin tuaj. Në shumë raste kam pasur gëzimin ta vizitoj e të
vlerësoj traditën e tij bujare të mikpritjes, të tolerancës, ashtu si edhe fuqinë
e fesë së tij të krishterë e kulturën e tij të lartë njerëzore e shpirtërore”. Këtë
herë – tha Papa – vij me rastin e kremtimit të 150-vjetorit të dukjeve të Virgjërës
Mari në Lurdë. Pasi të vizitoj Parisin do të kem gëzimin e madh të bashkohem me turmën
e shtegtarëve, që do të vijnë për të ndjekur etapat e Jubileut, në gjurmët e Shën
Bernardetës, në shpellën e Masabielës:
“Ma prière se fera intense aux
pieds de Notre Dame… Do të lutem me gjithë shpirt tek këmbët e Zojës,
për ndjetet e mbarë Kishës, posaçërisht për të sëmurët, më të braktisurit, por edhe
për paqen në botë. Virgjëra Mari qoftë për ju të gjithë, e posaçërisht për të rinjtë,
Nënë përherë e gatshme ndaj nevojave të bijve të saj, dritë shprese, që ju ndriçon
e ju prin në rrugën e jetës! Miq të dashur të Francës, ju ftoj të bashkoheni me lutjen
time, që ky shtegtim të sjellë fryte të begata. Në pritjen e gëzueshme për të qenë
së shpejti mes jush, kërkoj për ju të gjithë, për familjet tuaja e bashkësitë tuaja,
mbrojtjen amëtare të Virgjërës Mari, Zojës sonë të Lurdës. Zoti ju bekoftë!".