Benedikti XVI porosit ipeshkvijtë e Nikaraguas të dialogojnë, të ndihmojnë të varfërit
e të denoncojnë padrejtësitë.
(06.09.2008 RV)Një Kishë, që t’i jetojë vuajtjet e të varfërve e që, duke dëshmuar
të Vërtetën ungjillore, të luftojë kundër varfërisë e pabarazisë – këtë u kërkoi Benedikti
XVI ipeshkvijve të nikaraguanë, të cilët i vlerësoi shumë për ndihmën që i japin
popullit: "Observo con satisfacción que, como Pastores, compartís las vicisitudes..." Në
një vend si Nikaragua, në të cilin varfërisë dhe emigracionit u shtohen pabarazitë
shoqërore e situata e acaruar politike, Papa lavdëroi përpjekjet e prelatëve për krijimin
e klimës së dialogut, pa hequr dorë nga mbrojtja e të drejtave themelore të njeriut
e nga denoncimi i padrejtësive. Shenjtëria e Tij i nxiti të vijojnë përpjekjet për
krijimin e një koncepti të ri mbi politikën, e cila duhet parë jo si ambicie për pushtet
e për kontroll, por si shërbim bujar e i përvujtë, që i bëhet së mirës së përbashkët.
Papa i lavdëroi ipeshkvijtë edhe për nismat e shumta të bamirësisë e të solidaritetit
në favor të nevojtarëve. Më pas u ndalua në mënyrë të veçantë tek formimi i meshtarëve
dhe i laikëve, që kryejnë detyrën e katekistëve. "Es imprescindible que estos
generosos servidores y colaboradores..." Ati i Shenjtë i nxiti
prelatët nikaraguanë t’i ndjekin me kujdes këta shërbenjës bujarë e bashkëpunëtorë
të misionit ungjillëzues të Kishës. Theksoi me forcë edhe detyrën e formimit të një
kleri të përgatitur nga ana shpirtërore, intelektuale e njerëzore. Papa kërkoi të
zgjidhen me kujdes të madh kandidatët për seminar, që të jenë, pastaj, ‘meshtarë shembullorë’
e t’i japin një hov të ri punës baritore me rininë, me të sëmurët në spitale e me
të burgosurit. "Una mención especial merecen las instituciones educativas..." Më pas Benedikti XVI foli për rolin e institucioneve edukative në vend, që
kryejnë një shërbim jashtëzakonisht të vlefshëm për shoqërinë. Duke kujtuar përshpirtërinë
popullore, që në Nikaragua është shumë e ndjeshme, u bëri thirrje ipeshkvijve ta gjallërojnë
vazhdimisht, përmes veprimtarisë baritore, që ndriçon kuptimin e gjesteve e të simboleve,
duke u prirë besimtarëve drejt misterit të shëlbimit e të shpresës, i cili u përket
të gjithëve.