Ditën e festës liturgjike të Nënë Terezës, Kisha në Itali lutet për të krishterët
e Orisës.
(05.09.2008 RV)Në ditën e përkujtimit
liturgjik të së Lumes Nënë Terezë, Kisha italiane shpreh, me një Ditë lutjeje e agjërimi,
afërsinë e saj shpirtërore me besimtarët indianë të Orisës, viktima të dhunës kundër
të krishterëve. Kryesia e Konferencës ipeshkvnore italiane bashkon zërin me thirrjen
e fuqishme të Benediktit XVI, që dënoi çdo sulm kundër jetës njerëzore, duke i nxitur
të gjithë të kërkojnë rrugët e paqes e të harmonisë. I intrevistuar nga Radio Vatikani,
kryetari i Konferencës ipeshkvnore italiane, kardinali Anxhelo Banjasko, pasi
shpjegon se kjo ditë kremtohet për t’i shprehur solidaritetin më të thellë e më të
krishterë vëllezërve në fe, ndalet tek figura e së Lumes Nënë Terezë:
Përgjigje:
- Nënë Tereza është një shembull tejet i madh, e jo vetëm për Indinë, por
për mbarë botën, për Kishën në veçanti. Na kujton se mënyra më e mirë, më e frytshme
për t’iu përgjigjur persekutimit, thellësisht të padrejtë, është ajo e dashurisë dhe
e faljes. Nënë Tereza na mëson të vihemi në shërbim të njerëzve të varfër, të vuajtur
në korp e në shpirt, për dashuri të Krishtit e të Kishës. Prandaj, nga njëra anë,
uroj që feja e të krishterëve të forcohet gjithnjë e më shumë përmes gjakut të martirëve,
por nga ana tjetër, të pohojmë të vërtetën, të mbajmë qëndrim kundër padrejtësive,
pa harruar kurrë forcën e madhe të faljes e të dashurisë.
Kremtimi
i Ditës së sotme nga ana e Kishës italiane u prit me mirënjoihje nga ipeshkvijtë indianë,
të cilët do ta kremtojnë Ditën e tyre të lutjes për Orisën të dielën e ardhshme, më
7 shtator. Ndërkaq sot Misionaret e Bamirësisë u gjunjëzuan para varrit të Nënë
Terezës dhe iu lutën të ndërmjetësojë për paqen në Orisë. Intervistuam zëdhënësin
e episkopatit indian, atë Jozef Babu, me telefon nga Nju-Delhi.
Pyetje:
- Sot Kisha kujton Nënë Terezën. A mund të themi se edhe në këto kohë kaq
të vështira, të krishterët e Indisë janë shenjë dashurie e shprese, si Nëna e madhe
të varfërve?
Përgjigje: - Plotësisht e vërtetë. Nënë Tereza
ishte simbol universal i dashurisë, i bamirësisë e i shpresës. Indianët, pavarësisht
nga feja, e donin dhe e respektonin. Zëri i saj pajtonte, mjekonte plagët, sillte
bashkimin në Indi, prandaj unë besoj se ndjekësit e të gjitha grupeve fetare vijojnë
ta dëgjojnë zërin e saj e mesazhin e saj, e ne dëshirojmë që ky mesazh të jehojë fuqimisht
kudo, e sidomos, në shtetin e Orisës.