Të dielën, Benedikti XVI shkon në Kaliari të Sardenjës. Të rinjtë përgatiten ta presin.
(04.09.2008 RV) Vlojnë përgatitjet
në Kaliari për vizitën e Papës Benedikti XVI, që të dielën do të shkojë për të kremtuar
së bashku me sardët 110-vjetorin e shpalljes së Zojës si Pajtore më e Madhe e krejt
Sardenjës. Paradite, Ati i Shenjtë do të kremtojë Meshën në tremen e Shenjtores së
Zojës sonë të Bonarisë. Pasdite, takimi në katedralen e Kaliarit me meshtarët, seminaristët
dhe bashkësinë e Fakultetit Papnor Teologjik të Sardenjës. Vizita e 11-të baritore
e Benediktit XVI në Itali do të përfundojë me takimin me të rinjtë në Sheshin Jene.
Si përgatiten të rinjtë për këtë takim? Të dëgjojmë imzot Mozè Marçìa, ipeshkëv ndihmës
i Kaliarit: Ky takim është përgatitur prej kohësh; në muajin mars kemi përvijuar
një rrugë shpirtërore për të gjithë, të rinj e jo, në të gjitha famullitë e dioqezës
e të rajonit sard, një buletin ku ishin pasqyruar Zoja, Kisha dhe Papa. Më pas, pas
Pashkëve, kemi botuar një buletin tjetër, veçmas për të rinjtë, ku pasqyroheshin tri
temat themelore: Maria, Kisha dhe figura e shën Pjetrit. Kjo rrugë u përshkua deri
në përfundim të korrikut. Tani, si përgatitje në prag të ngjarjes, të shtunën më datë
6, në mëngjes, do të priten të rinjtë pranë Panairit Kampionar të Sardenjës, paradite
katekizmi dhe pasdite do të kryhet Udha e Lumnive, e cila është një rrugë edhe fizike,
përveçse shpirtërore. Grupe prej 100-150 të rinjsh do të përshkojnë këtë itinerar
në pikat më të rëndësishme historike të Kaliarit, duke reflektuar mbi Lumnitë, për
të përfunduar me Rrëfimet dhe adhurimin e Eukaristisë, e cila do të vazhdojë deri
në orën 2 të natës. Më pas, pushim për të pritur të dielën më 7 shtator, arritjen
e Papës dhe kremtimin eukaristik të orës 10.30. Në mbrëmje takimi i shumëpritur me
Papën.