Kardinali Martino flet për një dokument të ri vatikanas, kushtuar varfërisë në epokën
e globalizimit.
(02.09.2008 RV)Selia e Shenjtë po përgatit një dokument të ri, kushtuar varfërisë.
Njoftimin e dha kardinali Renato Rafaele Martino, kryetar i Këshillit Papnor për ‘Drejtësi
e Paqe’, gjatë Konferencës kontinentale për paraqitjen në Afrikë të ‘Përmbledhjes
së Doktrinës shoqërore të Kishës’, që u mbajt këto ditë në Dar-es-Salam të Tanzanisë. Dinamizmi
ungjillor i misionit kishtar na nxit që, ashtu siç bëri Jezusi - t’i privilegjojmë
të varfërit, t’ua kushtojmë forcat e burimet tona, ta shikojmë përtëritjen e shoqërisë,
duke u nisur pikërisht nga kërkesat e të varfërve – thekson kardinali Martino e shton
se varfëria, e posaçërisht pabarazia në rritje ndërmjet zonave, kontineteve e vendeve,
madje edhe brenda vetë këtyre të fundit, përbën problemin më dramatik, që duhet të
përballojë bota e sotme. Duke pasur parasysh këtë problem, Hirësia e Tij njoftoi se
“i vetëdijshëm për këtë situatë dramatike, Këshilli Papnor për Drejtësi e Paqe, po
përgatit një dokument me temë “Varfëria në epokën e globalizimit”.