Me Nënë Terezën : “Krishti ka uri ndër të Varfërit”.
(31.08.2008 RV)Të gjithë njerëzit,
që besojnë në Zotin, besojnë edhe në jetën e pasosur, mundohen ta jetojnë Ungjillin
e Krishtit, për të gëzuar një ditë me Zotin në Parajsë. Po si është Parajsa? Na e
kanë përshkruar shumë poetë e artistë. Mjafton të kujtojmë ‘Parajsën’ e Dante Aligerit.
Po ne, në emisionin e 26-të të ciklit radiofonik “Me Nënë Terezën”, duke shfletuar
librin ‘Jeta ime’, do ta shohim sot me syrin e së Lumes së parë shqiptare:
“Shumë
kohë më parë mora një letër nga një brazilian, në gjendje të shkëlqyer ekonomike e
shoqërore. Më shkruante se e kishte humbur plotësisht shpresën në Zotin
e besimin në njeriun. Nuk meritonin asnjë vëmendje. Për më tepër, kishte
lënë edhe punën e s’mendonte tjetër, veçse të vriste veten.Por një ditë, ndërsa po
kalonte para një dyqani ku shiteshin orendi shtëpijake, pa në televizor motrat e mia
duke shërbyer në Shtëpinë tonë për njerëzit në prag të vdekjes. U mrekullua nga ngrohtësia
njerëzore që buronte prej duarve të tyre, në sa u fshinin njerëzve, në agoni, ballin
e rimë me djersën e vdekjes. Më shkruante se, pasi kishte parë këtë skenë,
kishte rënë në gjunj në rrugë të madhe e, pas sa e sa vitesh, kishte nisur të lutej.
E kishte marrë vendim të rikthehej tek Zoti e t’i besonte përsëri njeriut, me bindjen
se Hyji vijon ta dojë botën. Se Krishti ka uri ndër të varfërit, të cilëve vendosi
t’u shërbejë. Kujtoj se në kohët e para të misionit tim të ri, pata ethe
të forta e, nëpër jerm, e pashë veten para vetë Shën Pjetrit, me çelësat e Parajsës
në brez. Më pa, më njohu e më tha: ‘Nisu prej këndej. Këtu s’ka
punë për ty. Në qiell s’ka baraka’. U zemërova sa më s’ka e iu përgjigja: ‘S’ka,
por do të ketë! Unë do ta mbush qiellin me varfanjakët e mi, e kështu në Parajsë do
të ketë edhe baraka”. U riktheva, pastaj, në tokë. Nuk vdiqa. Ethet më lanë
e nuk shkova në shtëpinë e Zotit, ku sigurisht nuk do të ketë kurrë nevojë për barakat
e mia! E ku të gjithë do të shkojmë një ditë…”.