(28.08.2008 RV)Një udhëtim prej
dymbëdhjetë orësh, duke përfshirë edhe shkuarje-ardhjen. Katër fjalime, disa takime,
ndërmjet të cilave, edhe ai me të rinjtë, si dhe vizita në Shenjtëroren e Zojës së
Bonarias. Këto, thënë me dy fjalë, janë etapat e shtegtimit të Benediktit XVI në Kaliari,
të dielën, më 7 shtator. Programi i hollësishëm i vizitës u bë i njohur dje nga
Salla e Shtypit e Vatikanit. Ati i Shenjtë do të arrijë në aeroportin e kryeqendrës
sarde në orën 9. 30 e do të pritet nga kryeipeshkvi, imzot Gjuzepe Mani si dhe nga
autoritetet më të larta civile e kishtare të vendit. Do të vizitojë, në vijim, Shenjtëroren
kaliaritane, në sheshin para së cilës do të kremtojë Meshën Shenjte dhe lutjen e Engjëllit
të Tënzot. Më pas do të shkojë në Seminar, ku do të takohet me seminaristët e Sardenjës
e do të drekojë me ipeshkvijtë e Ishullit. Ndërmjet takimeve të pasdites, kujtojmë
përshëndetjen drejtuar organizatorëve të vizitës, takimin, në katedrale, me meshtarët
dhe me bashkësinë e Fakultetit Papnor teologjik të Sardenjës, të cilëve Papa do t’u
drejtojë fjalën e rastit. Së fundi, pak para orës 18. 00, Benedikti XVI do të takohet
me të rinjtë, në sheshin Yenne të Kaliarit. Edhe në këtë rast, pasi të ketë dëgjuar
dy përfaqësues të të rinjve, do t’u drejtojë fjalën të pranishmëve. Në mbrëmje Ati
i Shenjtë do të rikthehet në Romë, në aeroportin e Çampinos. Papa Racinger e viziton
Kaliarin 38 vjet pas Palit VI e 23 vjet pas Gjon Palit II. Papa Vojtila e vizitoi
Sardenjën nga data 18 deri më 20 tetor të vitit 1985, duke u ndaluar në disa qytete.
Në takimin me besimtarët, i pati porositur “ta ndërtojnë të tashmen e të ardhshmen
mbi bazat e Ungjillit, që e pasuron dhe e larton njeriun në të gjitha përmasat”, porosi
që nuk do të mungojë as në takimin e ri me Papën Racinger, i cili shkon në Kaliari
pikërisht kur kremtohet një Vit i posaçëm marian (16 shtator 2007- 21 shtator 2008),
për të kujtuar njëqindvjetorin e shpalljes së Zojës së Bonarias, Pajtore kryesore
e Sardenjës. Shenjtërorja e Zojës lartohet mbi kodrën me të njëjtin emër që nga viti
1370, kur, sipas traditës, arriti këtu nga deti.