Në Indi sulme shqetësuese kundër të krishterëve. Selia e Shenjtë thirrje t’i jepet
fund dhunës!
(26.08.2008 RV)“Vdekje të krishterëve!”– me këtë parullë fanatikët hinduistë
të Indisë lindore, e pikërisht të shtetit të Orisës, sulmuan kisha e qëndra të bamirësisë,
duke vrarë një besimtar dhe një misionare laike. Gruaja, e djegur gjallë në një ndërtesë
të kallur flakë nga fanatikët, ishte 20 vjeçe e punonte pranë jetimores, drejtuar
nga misionarët e krishterë në Kuntapali. Aty nga mesi i gushtit, në Andra Pradesh
u mbyt mizorisht edhe rregulltari karmelitan, atë Tomas Pandipalil, ndërsa po shkonte
të kremtonte Meshën Shenjte. E bashkë me ipeshkvijtë indianë, pak ditë më parë,
edhe kryeipeshkvi i dioqezës së Kutak Bubaneshvar në Orisë, imzot Rafael Shenath,
dënoi ashpër vrasjen e liderit hinduist Laksananda dhe hodhi poshtë çdo hamendje
për vrasjen e tij nga katolikët.
Ndërkaq, një Komunikatë
Shtypi e Selisë Apostolike, thekson: Lidhur me lajmet tragjike të ushtrimit të
dhunës kundër besimtarëve dhe institucioneve të Kishës katolike, që vijnë nga India,
Selia e Shenjtë, ndërsa u shpreh solidaritetin Kishave vendase dhe Kongregatave rregulltare
të përfshira në këtë valë, i dënon këto veprime, të cilat cënojnë dinjitetin dhe lirinë
e njerëzve e vënë në rrezik bashkëjetesën paqësore civile. Njëkohësisht u bën thirrje
të gjithëve që, me ndjenjë përgjegjësie, t’i jipet fund çdo shfaqjeje të dhunës e
të rivendoset atmosfera e dialogut dhe e respektit të ndërsjelltë.