Atë Lombardi komenton intervistën dhënë Tg1 nga ipeshkvi i Pekinit
(21.08.2008 RV)Dje Tg1 RAI intervistoi
ipeshkvin e Pekinit, Jozef Li-Shan, i cili foli kryesisht për situatën e Kishës në
Kinë. Në vend – tha prelati – numërohen 8 deri në 10 milionë katolikë. Në Pekin ka
20 kisha e, në ditët e festive, kremtohen 3-4 Meshë, që ndiqen nga rreth 3 mijë besimtarë
për çdo funksion. Ipeshkvi tha edhe se marrëdhëniet ndërmjet Selisë së Shenjtë e Pekinit
vijojnë të bëhen gjithnjë më të mira dhe se ‘ka zhvillime të mëdha’; uroi, më pas,
edhe një shtegtim të Papës në Kinë. Mbi këtë intervistë, të dëgjojmë reagimin e drejtorit
të Sallës vatikanase të Shtypit, Atë Federiko Lombardit, në mikrofonin e Radio
Vatikanit:
Përgjigje: - Intervista e ipeshkvit Li-Shan mund
të konsiderohet një nga sinjalet me të cilat pala kineze i përgjigjet gatishmërisë
dhe urimit të bërë nga ana e Papës, në letrën drejtuar katolikëve kinezë një vit
më parë, për të kërkuar normalizimin e marrëdhënieve ndërmjet Kinës e Selisë së Shenjtë.
Pyetje:
- Ç’mund të na thoni për gjendjen aktuale të marrëdhënive ndërmjet Selisë
së Shenjtë e Kinës?
Përgjigje: - Probleme
të ndryshme të rëndësishme janë zgjidhur, por Selia e Shenjtë ka dëshirë dhe vullnet
që të vijohet përpjekja për të çuar përpara një dialog të ndershëm e ndërtues.
Pyetje:
- Ipeshkvi Li-Shan uroi të realizohet edhe një shtegtim të Papës në Kinë…
Përgjigje:
- Tani për tani, të flasësh për një shtegtim të Papës në Kinë, është krejt
e parakohshme. Megjithatë fjalët e ipeshkvit Li-Shan tregojnë se të gjithë katolikët
kinezë e duan dhe e respektojnë Papën, e pranojnë autoritetin e tij e do ta takonin
me kënaqësi të madhe; e ky, sigurisht është një aspekt pozitiv e shumë inkurajues.