Vrasje brutale e një rregulltari karmelitan në Indi
(18.08.2008 RV)Sulm i ri tragjik antikatolik në Indi, në shtetin e Andra Pradeshit:
natën e 16 gushtit u mbyt mizorisht rregulltari karmelitan Tomas Pandipalil. Sipas
agjensisë AziaNjuz meshtari, 38 vjeç, u mbyt në Mosalikunta, në rrugën që lidh Lingampet
me Jelaredi. Kufoma kishte një pamje të llahtarshme: me plagë të thella në fytyrë,
me duar e këmbë të thyera e me sytë e nxjerrë nga zgavrrat. “Tomasi është martir:
flijoi jetën për të varfërit e të flakurit jashtë radhëve të shoqërisë. Por vdekja
e tij nuk është e kotë, sepse trupi i tij i sakatosur e gjaku i tij i derdhur në trojet
indiane, do ta forcojnë Kishën në Indi e posaçërisht në Andra Pradesh”. Kështu e komentoi
imzot Joji, kryeipeshkëv i Hiderabadit e sekretar i Konferencës ipeshkvnore të Andra
Pradeshit (Shtet në jug të Indisë), mbytjen mizore të rregulltarit. Pas kësaj vrasjeje,
fryt i atmosferës së intolerancës e të dhunës në rritje, Kisha në Indi është thellësisht
e shqetësuar, por njëkohësisht edhe e thirrur ta vijojë impenjimin e saj për zhvillimin
e zonave më të varfëra e më të braktisura të vendit. Për këtë është ‘fajtore’ Kisha
katolike e për këtë edhe sulmohet, sepse mbron gjithnjë e me të gjitha format e mundshme,
viktimat e dhunës, të shtypjes e të shfrytëzimit. Rregulltari i mbytyr mizorisht
punonte në fushën e arsimit e të shndetësisë, ku dha një kontribut vërtetë të shquar
për popullsinë më të varfër vendase.