Në Engjëllin e Tënzot, Papa bën thirrje për paqen në Gjeorgji.
(18.08.2008 RV)Të hapen pa vonesë
korridore humanitare për t’u çuar ndihmë popullsive në Gjeorgji e Osecie: është thirrja
e fuqishme e Benediktit XVI në lutjen e djeshme të Engjëllit të Tënzot, kremtuar në
Pallatin Apostolik të Kastel Gandolfos. Në Engjëllin e Tënzot Ati i Shenjtë u shprehu
afërsinë e tij viktimave të konfliktit. Papa, që ndjek me vëmendje e shqetësim situatën
në Gjeorgji, iu drejtua si palëve në konflikt, ashtu dhe Bashkësisë Ndërkombëtare: “Bëj
thirrje të lehtësohen bujarisht shqetësimet e shumta të refugjatëve, posaçërisht të
grave e të fëmijëve, të cilëve u mungojnë edhe gjërat më të nevojshme për jetën. Kërkoj
hapjen, pa vonesa të tjera, të korridoreve humanitare ndërmjet zonës së Osecies jugore
e Gjeorgjisë, në mënyrë që të vdekurit, ende të braktisur udhëve, të varrosen me dinjitet;
të plagosurit të mjekohen e t’u krijohen kushtet përshtatshme atyre që duan të bashkohen
me të dashurit. T’u garantohet edhe pakicave etnike në konflikt paprekshmëria e të
drejtave themelore, që nuk duhet të shkelen në asnjë rrethanë. Uroj, në përfundim,
që armëpushimi, i arritur në sajë të kontributit të Bashkimit Evropian, të fuqizohet
e të shndërrohet në paqe të qëndrueshme”. E më pas Papa e ftoi Bashkësinë Ndërkomnbëtare
ta vijojë ndihmën për gjetjen e një rrugëzgjidhjeje të drejtë përmes dialogut e vullnetit
të mirë të përbashkët.